Shillong, Ïaïong 12
Ka Shillong All Faiths Forum (SAFF) ka la kyrpad ïa ki nongshong shnong ka Jylla ban pynneh-pynsah ïa ka suk ka saiñ bad ban kiar na kino-kino ki kam kiba wanrah ïa ka jingisih bad jingkulmar.
“Ka SAFF ka ban biang bad kyrpad ïa baroh ki nongshong shnong ban pynneh-pynsah ïa ka suk ka saiñ bad ka jingïadei paralok hapdeng baroh ki jaidbynriew kiba shong ba sah hapoh ka Jylla kumjuh ban kiar na kino-kino ki kam kiba wanrah jingisih bad jingkulmar,” la ong u Secretary ka SAFF, Fr. Richard M. Majaw ha ka kyrwoh khubor.
Ka kynhun ka kyrpad ruh ïa baroh ba katba dang jan ki sngi sha ka ilekshon Lok Sabha, ki nongshong shnong ki dei ban long kiba jai-jai bad kiba shai.
“Ka jingsuk ka dei ka dak ba u Blei u don ryngkat bad ngi lada ngi buh ïa u ha ka dohnud bad hapdeng jong ngi. Ka jingsuk ka dei kaei kaba u Blei u kwah ban ai sha u khun bynriew,” la ong u Secretary.
Ha kajuh ka por, u la ong ba kum ki nongïalam niam, baroh ki dkhot jong ka SAFF ki ïeng na bynta ka suk ka saiñ bad ka hok.
Ha kawei ka liang, ka SAFF ka pynpaw ka jingsngewkhia halor ki jingshah pynïap kiba dang shen ha Ichamati bad Mawlai Mawroh.
Kum ban shu kdew hangne, ha ka janmiet 27 tarik jong u bnai ba la dep, ki pulit ki la lap ïa ar tylli ki metïap jong bar jylla ba la suba jur ba ka jingkhlad ka lah ban dei na ka jingshah bom ïap ha ka shnong Ichamati kaba dang hap hapoh ka Sohra Civil Sub-Division.
Kumjuh, uwei u nongbylla bar jylla ha ka 10 tarik mynta u bnai u la duh ei la ka jingim bad ar ngut pat ki la mynsaw na ka jingshah thombor ha ka kynhun ki runar ki bym lah ban ithuh durkhmat satia.
“Ngi kyntu ïa ka Sorkar bad ki bor ba dei khmih ban ïada ïa ki nongshong shnong bad ban khang lad ïa kiba kum kitei ki jingkulmar hapoh ka Jylla,” la ong u Fr. Majaw.
