Shillong, Ïaïong 12
Ka lahduh jong ka aïom ba la dep, ka Mawlai SC, ka la bteng ïa ka jingjop kaba lai ha ka lympung ïalehkai Shillong Premier League 2023-24. Kane ka wan urlong hadien ba ka lah pynliem ïa ka Nongthymmai SC da 2-1 kol ha ka Sngi Thohdieng ha SSA Stadium kaba ha 1st Ground, Polo.
Kane ka nam jop ka la wan urlong ruh lyngba ki kol u Dajiedlang Wanshnong bad u Pynbha Suting bad na ka Nongthymmai la thep da u Rabi Handsa.
Ka Mawlai ka la long ka kynhun kaba nyngkong eh ban kamai 10 point hadien ba ka jop lai sien bad ïakhaid shisien, katba ka Nongthymmai ka dang ïai sah ha ka kyrdan ba hynriew bad 3 point.
Ha kane ka jingïakhun baroh ar ki kynhun ki la pyrshang ban ïakhun tyngeh naduh kaba sdang ha kaba ki la ïoh ïa ki kabu kiba biang, hynrei kim shym la lah ban thep haduh kaba kut jong ka kylla step.
Hadien katto-katne por ba la bteng ïa ka jingïakhun jong ka kylla miet, ka Mawlai ka la ïoh ïa ka kabu kaba biang ban pynkhih jar lyngba u Dajiedlang Wanshnong ha ka minit kaba 58.
Hadien katto katne por ka Nongthymmai ka la lah ban pynphai kylla lyngba u Rabi Handsa ha ka minit kaba 80 na ka bynta ban ïakhaid mar shi kol. Hynrei shwa ban wai ka jingïalehkai, ka Mawlai ka la ïoh ban thep biang ïa ka kol kaba ar lyngba u Pynbha Suting ha ka minit kaba 86 na ka bynta ban khur syndon ïa ka jingjop.
Ka jingïalehkai ha ka Sngi Saitjaiñ kan long hapdeng ka Rangdajied United FC pyrshah ïa ka Shillong Lajong FC ha ka por 3 baje janmiet. Kine ki kynhun ki dei kiba la kamai mar 9 point, hynrei ka Lajong ka la tam lyngba ka ‘goal difference’.
