New Delhi, ïaïong:
U Myntri ka tnat ïada Ri u Rajnath Singh u la ïai ban da kaba ong ba ka Pakistan ka la dei ban pynkut noh ïa ki kam pyntriem jong ki lehnoh na katei ka ri lada kam sngewïahap ban leh kumta, ka lah ban shim ka jingïarap jong ka ri India.
Ha ka jingïakren bad ki lad phah khubor, u Rajnath Singh u la ban jur da kaba ong ba lada ka Pakistan ka pyrshang ban pyntlot ïa ka ri India da kaba pyndonkam da ki lehnoh ne ki kam pyntriem jong ki, ka la donkam ban hap khmih thuh bad leh ïa kaba donkam ha kaba ïadei bad kane ka bynta.
Ka India ka la ïai ong ba kam lah ban shu shah ha kaba ïadei bad ka jingdon jong ki kam pyntriem ki lehnoh ha ki bynta khappud bad kam lah ban buh sharud ïa ki kam pyntriem jong ki lehnoh na ka bynta ban kyntiew ïa ka jingïadei bad ka Islamabad.
Ka New Delhi ka la ong ruh ba ka jing-kitkhlieh ka shong ha ka Islamabad na ka bynta ban wanrah ka jingkylla ha kaba yn pynduh ïa ki lehnoh, ïa ki nongshun bad ki kam pyntriem.
U Rajnath Singh u la ong ba lada ka jingthmu jong ka Pakistan ka long kaba bha, ka la dei ban ïakhun pyrshah halor ki kam pyntriem jong ki lehnoh ha ki bynta khappud.
“Lada ka Pakistan ka pyrshang ban pyntlot ïa ka India lyngba ki kam pyntriem jong ki lehnoh, ka la donkam ban hap shim da ki lad ban ïakhun pyrshah. Ka Pakistan ka la donkam ban tehlakam ïa ki kam pyntriem jong ki lehnoh. Lada ka Pakistan ka pyrkhat ba kam lah ban tehlakam halor jong ka, kata ka India kaba long ka ri ba marjan, lada ka kwah jingïarap ka la dei ban phai sha ka, lada ki sngewthuh ba kim lah shisha ban ïakhun pyrshah halor kane, lada ki kwah ban pan jingïarap na ka ri India ki lah ban pan. Ka India ka la long kaba la khreh na ka bynta ban pynbiang ki jingïarap ha baroh ki liang na ka bynta ban ïakhun pyrshah ïa ki kam pyntriem jong ki lehnoh,” u la ong.
“Ki la long ki marjan jong ngi, bad lada ki don jingthmu ban pynduh pyndam ïa ki kam pyntriem bad ïa ki lehnoh ki la dei ma ki dalade ban pan jingïarap na ka ri India…da ka jingïatreilang yn sa lah shisha ban pynduh pyndam ïa ki kam pyntriem jong ki lehnoh. Hynrei kane ka shong ha ka jingkwah jong ki, kane ka long tang ka jingai jingmut jong nga,” la bynrap u Singh.
