Shillong, Ïaïong 12
Ka Voice of the People Party (VPP) ha ka Sngi Thohdieng ka la pynpaw ba kum ka seng kaba burom ïa ka Riti Synshar jong ka Ri bad ïa ki nongrim jong ki aiñ ki kanun, ka pynrem jur ïa ka jingpynïap im-im peit-peit ïa uwei u nongbylla ha Mawlai Mawroh ha kine ki sngi ba la dep.
Ha u kyrwoh khubor, u nongaiktien jong ka VPP, u Dr Batskhem Myrboh, u la ong ba mano-mano kim don hok ban shim jyndat ïa ka mynsiem jongno-jongno.
Ka hok ban im ka dei ka hok longbriew-manbriew jong uwei-pa-uwei u briew la u dei na kano-kano ka jaitbynriew, ka jait ne ka niam bad ïa kane ka hok la pynskhem ha ki aiñ satlak ka pyrthei bad ka Ri, la ong u Dr. Myrboh.
U la kyntu ïa ka sorkar jylla ban shim ïa ki lad ki lynti ban pynthikna ba ka aiñ ka dei ban treikam bad ïa kiba donkti kin ïoh ïa ka jingpynshitom katkum ki kyndon.
Nalorkata u la ong ba katei ka jingjia ka la pynjah burom shibun eh ïa kane ka jylla kaba la bna nam namar ki kam pynkheiñ aiñ bad ki kam bamsap ba la leh da kito kiba don ha ka bor.
