Bengaluru, ïaïong:
Kumba la khmih lynti la ong ba u Myntri Rangbahduh u Narendra Modi un sa leit ai jingkren ha ka jingïalang paidbah kaba heh ha Mysuru bad pynlong ïa ki jingïaid paidbah ha ki surok ha Mangaluru ha ka Sngi U Blei, la ïathuh u General Secretary jong ka seng BJP u V Sunil Kumar.
U Myntri Rangbahduh u la thmu ban pynlong ïa ka jingïalap ilekshon na ka bynta ka ilekshon Lok Sabha ban wan ha Karnataka ha bakut jong kane ka taïew, na ka bynta ka jingïalang paidbah ka ban long ha Mysuru bad ka jingïaid paidbah ha Mangaluru ha ka Sngi U Blei.
Kane ka la long hadien ba la dep ban pynlong ïa kiba bun ki jingïalang paidbah kiba heh da u Myntri Rangbahduh ha Kalaburagi bad Shivamogga distrik jong ka jylla mynshem bnai.
U Modi un sa pynlong ïa ka jingïalang paidbah kaba heh ha ryngkat ka jingdonlang jong ki nongïalam ka seng BJP bad kumjuh jong ka seng JD(S) ha Mysuru ha katei ka sngi, bad hadien kane un sa ai jingkren ha ka jingïaid paidbah ha ka surok kaba jngai da kumba 1.5 km ha ka nongbah Mangaluru. Shuh shuh la ïathuh ba u Modi u la pyllait paidbah ïa ka jingïalap ilekshon jong ka seng Bharatiya Janata Party na ka shnong jong u President jong ka seng Congress ha ka ri u M Mallikarjun Kharge na Kalaburagi, kaba don ha Karnataka.
Hadien kane, la khmih lynti ba un sa ai jingkren sa ha ka jingïalang paidbah kaba heh ha Mysuru bad pynlong ïa ka jingïaid paidbah ha ka surok ha Mangaluru, la ong u Kumar, kumba la ïathuh ki nongthoh khubor.
Ha kaba nyngkong, u Modi un sa ai jingkren ha ka jingïalang paidbah kaba heh, kynthup lang ki nongïalam na baroh ar tylli ki seng, kata na ka seng BJP bad ka seng ba la ïasynroplang ka Janata Dal (Secular) ne JD(S).
Ki nongbud jong ka seng na Mysuru, Chamarajanagar, Mandya bad Hassan Lok Sabha konstitwensi kumba la khmih lynti kin sa don bynta ha ka jingïalang paidbah.
Ka prokram kan sa long ha madan Maharaja College kaba don ha Mysuru.
U Modi un sa leit sa sha Mangaluru ha Dakshina Kannada distrik bad pynlong ïa ka jingïaid paidbah ha ka surok ha ka por 6 baje janmiet.
Ka jingïaid paidbah ha ka surok, kan sa long na ka bynta 1.5 kilometres,na Narayana Guru Circle sha Nava Bharat Circle, la ïathu ka tyllong khubor.
Nalor kine, u Myntri ka tnat korbar ri jong ka sorkar kmie u S Jaishankar ruh un sa don bynta lang ha ka jingïalap ilekshon ha Bengaluru ha ka sngi kaba bud, kata ha ka 15 tarik, Ïaïong, ha ka Lah Sngi U Blei, la ïathuh u Sunil Kumar.
