Shillong, Ïaïong 14
Ka East Khasi Hills Cricket Association (EKHCA) kan sdang noh ïa ka lympung ïalehkai kriket ki khynnah skul kata ka Inter School Cricket Tournament naduh ka 16 tarik mynta u bnai ka ban pynlong ha Shortimai Syiem Stadium ha Smit.
Nalor ka lympung Inter School Cricket, ka EKHCA kan pynlong ruh ïa ka lympung Lt. Benjamin Diengdoh Memorial Trophy kata ba la phiah ha ki ar bynta, ka Under 15 Boys bad ka Under 17 Girls.
Haba phai sha ka U-15 Boys, ki don haduh 6 tylli ki kynhun bad ïa kine la phiah ha ki ar tylli ki group. Ha ka Group-A ki long ka Mawryng-kneng Cluster, ka Sohra Cluster (B) bad ka Mawsynram Cluster. Ha ka Group-B ki long ka Sohra Cluster (A), ka STCC Pongtung Cluster bad ka Laitjem Cluster.
Ki jingïalehkai sdang, kata ha ka 16 tarik kan long hapdeng ka Mawryngkneng Cluster pyrshah ïa ka Mawsynram Cluster bad ka Sohra Cluster (A) pyrshah ïa ka STCC Pongtung Cluster.
Haba phai pat sha ka U-17 Girls, ki don tang 4 tylli ki kynhun, ba kynthup ïa ka Sohra Super Nova, ka Mawryngkneng Tigress, ka Mawsynram Pink Panthers bad ka STCC Pongtung Lioness. Ka jingïalehkai sdang jong ki kynthei kan sdang naduh ka 22 tarik mynta u bnai bad ki ar tylli ki kynhun kiba wan ha ka kyrdan kaba nyngkong bad ba-ar kin ïoh rung sha ka final kaba la buh ban pynlong ha ka 27 tarik mynta u bnai.
