Shillong, Ïaïong 14
Ban wanrah ïa ka jingïajan hapdeng jong ki khun samla Khasi kiba shong ba sah ha ki shnong bad ki dong kiba hap hapoh ka jylli treikam jong ka KSU Shillong Mihngi Circle, ka seng ha ka sngi Saitjaiñ ka la ïoh ban plie pyrda noh ïa ka lympung ïalehkai ba la tip kum ka Maitshaphrang Knockout Football Tournament 2024.
Ka jingthmu jong kane ka lympung ka long ban ai mynsiem ïa ki khun samla kiba hap hapoh ka jylli treikam jong ka KSU Shillong Mihngi Circle khnang ba kin lah ban pyni ïa la ki sap ki phong kiba U Blei u la pynkup ha ki ‘rangïalehkai bad ruh ban pyllait ïa ki na ki jingdih kiba sniew kum u drok bad kiwei kiwei.
Ïa kane ka lympung la wan ban plie pyrda da u samla Biangbor Lyngdoh Paliar (Vice President ka KSU Sengkmie) ha ka jingdon ryngkat u samla Klinstar Shabong (Asst Organising Secretary KSU Sengkmie), samla Sonstar Nongkhlaw (President ka KSU Shillong Mihngi Circle), ki dkhot ka jylli bad ki shnat bapher bapher.
U samla Biangbor Lyngdoh Paliar haba ai jingkren u la kitbok kitrwiang ïa baroh ki kynhun kiba ïashim bynta bad u la pynkynmaw ba kam dei ka sien kaba nyngkong ba ka seng kan pynlong ïa kum kine ki lympung hynrei na ka por sha ka por ka ju pyrshang ban plie ki lad ki lynti ïa ki khun samla ban pyni bad pynjanai ïa la ka sap ïalehkai phutbol bad kiwei kiwei ki sap ïalehkai da kaba pynlong ïa ki lympung bapher bapher.
La wan ban pynshngaiñ lang ha katei ka sngi da ki nongkitkam shnong jong ka shnong Mawlong, Mawkynring bad kiwei kiwei kiba la ai mynsiem bad jingïaroh ïa ka seng na ka bynta katei ka sienjam.
