Shillong, Ïaïong 14
U slap uba jur u la hap ha kylleng ki jaka ha ryngkat ka jinghap phria ha ka janmiet Sngi U Blei. Kane ka jinghap phria ka la ktah bha khamtam ïa ki diengsoh kiba la sdang ban phuh syntiew nalor kiwei ki jingthung kiba la sdang ban khie lung.
La ong ba ka jinghap slap ka la jia ha thaiñ Riwar ha ryngkat ka jinghap phria kaba la neh kumba katto-katne por.
Ha nongbah Shillong ruh u slap uba jur u la ther bad kane ka la pynthut ruh ïa ka sngi basdang ka Shad Suk Mynsiem khamtam ha lympung shad kaba ha Weiking, Jaïaw.
La ïathuh ba ka jinghap u phria ka la ktah ïa ki jingthung jingtep khamtam ïa ki diengsoh ha ki jaka ba ki diengsoh ki la sdang ban phuh syntiew. Da ka jinghap u phria, ki syntiew soh ki la tlor bad hap noh sha khyndew.
Ki don ruh ki jaka ha kaba ki jingthung kiba la sdang ban mih ki la shah lynshop noh ha u phria bad kan ktah ïa ka jingheh jingsan jong ki.
