Shillong, Ïaïong 14
Ki riewngeit jong ka Balang Presbyterian kiba la poi sha ka Jingïaseng Khasi Jaiñtia Presbyterian Assembly Samla kaba 11 kaba la long ha Balang Presbyterian Mawlong, Sohra Presbytery, KJP Synod Sepngi kaba hap ha Shella konstitwensi, East Khasi Hills District kiba bun ki dei kiba shong ha tynrai dieng namar ka jingshit kyrang ka sngi kaba la long ha ka Sngi U Blei.
Kane ka jingïaseng KJP Assembly ka dei ka jingïakynduh kaba shisien shisnem ki samla jong lai tylli ki Synod, kita ka KJP Synod Sepngi, KJP Synod Mihngi bad KJP Synod Pdeng. Ha kane ka sngi ki riewngeit kiba shong ha madan ki la hap ban kup da ka shatri namar ka jingshit kyrang palat ka sngi.
Kane ka jingïaseng ka la sdang naduh ka 12 tarik bad kut ha ka 14 tarik Ïaïong 2024. Ïa ka jingïaseng ha kane ka sngi la pynïaid da u Rev. S.D Lanong kum Chairman bad la pynshit rhem shuh shuh ïa kane ka jingshakri da ka jingrwai na ka KJP Standing Choir Mihngi, Sepngi, Pdeng, Balang Mawreng, Mawlong, Mookaiaw, Lama bad ka Jingïaseng Khynnah Balang Mawlong.
Ha ka jingïaseng kaba 10:30 mynstep la sam ïa ka khubor na ka ktien u Blei da u Rev. P.W Makdoh bad ha ka jingïaseng 1:30 nohphai sngi la sam ïa ka khubor na u Rev. C.L Laloo. U Pastor S.D Lanong u la ïathuh ba ka jingshit ka suiñbneng ha ka Sngi Saitjaiñ ka poi palat 32 degree bad mynta ka Sngi U Blei ka jingshit ka poi 24 degree.
