Shillong, Ïaïong 14
Haba pynsngewthuh ïa ka nongrim jong ka jingjied nongmihkhmat ha kane ka ilekshon Lok Sabha na Shillong parliamentary konstitwensi, u nongïalam ka kynhun Regional Democratic Alliance (RDA) u Bah Bhaling Mawkhiew u la banjur ba ki paidbah ki dei ban pyrkhat sani ym ban shu shongshit tang namar ba don ba pynshit ne sngewtynnad ïa ka jingrwai ha ka por ilekshon.
U Bah Mawkhiew uba dei u nongïalam ka Hill State People’s Democratic Party (HSPDP) u la pynpaw ïa kane haba ïalap ilekshon ha ka Sngi Saitjaiñ na ka bynta u kyrtong ka RDA u Bah Robertjune Kharjahrin ha Ïewrynghep, Raid Ryngi kaba hap ha Mawkynrew konstitwensi.
U Bah Mawkhiew u la pynkynmaw ïa ki nongïalam kiba khraw kiba shemphang jong ka jaitbynriew kiba leit mihkhmat sha Parliament ha ki phew snem ba la leit noh bad kiba dei na ki seng riewlum kum u Prof. G.G Swell bad kiwei bad nud ruh ban kren ïa ki mat ki jura kiba ktah ïa ka Jylla. Hynrei kito kiba ong ba ka por jong u Prof. G.G Swell, B.B Lyngdoh ka la kut, ka long kaei-kaei kaba ym lah pdiang namar kine ki nongïalam ki la nohsynñiang bad ki kam jong ki, ki neh ki sah ha ki longdien ban kynmaw bad bud nuksa.
U la ong ba ki nongrim jong ka United Democratic Party (UDP) bad Hill State People’s Democratic Party (HSPDP) ki long kiba skhem bad kum ka kynhun RDA ka la jied janai ïa u kyrtong ha kane ka ilekshon MP da kaba phah ïa u Bah Robertjune Kharjahrin u samla uba la don lypa ka jingtip bad jingshemphang ïa ki aiñ bad lada jied ïa u kum u MP un long shisha nongthaw aiñ bad ka jingsarong ïa ka jaitbynriew.
Namar kata, u Bah Mawkhiew u la kyntu ïa ki paidbah ka Mawkynrew konstitwensi bad ka Ri Khasi Jaiñtia baroh kawei ban ai ka jingkyrshan ïa u kyrtong ka RDA khnang ba un long u simpah u simsong ha Parliament na ka bynta ka jaitbynriew bad ym dei ban shu shongshit kat ïa kane ka kam bah ka kam san ban phah ïa u nongmihkhmat sha ka Ïingdorbar Thawaiñ jong ka ri.
“Hynrei lada ngi shongshit tang namar ba don kiba nang ban pynshit bad lada shongshit tang namar ka jingrwai ilekshon, ka bha ba ngi jied noh da u nongthaw jingrwai (Bah Smiling Mylliemngap),” la ong u Bah Mawkhiew haba kren siat ïa ka jingshongshit ki briew ïa ka jingrwai ‘meinah panah ha u prah’ kaba dei ka jingrwai ilekshon jong ka Voice of the People Party (VPP).
U Bah Mawkhiew u la kyrpad ruh ïa ki paidbah ban da tip bha ïa ka jinglong jong ki nongïalam namar kum ki briew ym lah ban shu kren kob ba kiwei ki dei kiba duna lut hynrei ban shu kam ïalade ba tang ma nga uba biang lut.
Na ka liang u Bah Briek Khriam ruh u la pynkynmaw ïa ki matti jong ki nongïalam kiba mynshwa kiba dei na ki seng riewlum kiba la ïakhun ban pynïoh ïa ka Jylla bad ym dei ba ka jingïoh ïa ka Jylla ka shu wan hi kumto.
U la ong ba wat lada u Bah Ardent Basaïawmoit u la kren tohmet ïa ka UDP bad HSPDP, hynrei ha ki snem ba la leit une hi u juh u rangbah uba ïaroh ba ym don shuh kat ka UDP bad ka HSPDP. Hynrei ha u snem 2019 une u juh u rangbah u leit ïaroh sa ïa kiwei ki seng saiñ pyrthei na rithor.
U la ong ba ynda u la thaw seng thymmai, u beiñ lut ïa kiwei da kaba kam ïalade ba dei tang ka seng jong u kaba biang kiwei pat ki dei ki bym larkam.
Kumta u la kyntu ïa ki paidbah ban kyrshan ïa ka RDA ka kynhun jong ka UDP bad HSPDP bad jied ïa u Bah Robertjune Kharjahrin uba dei u nongsaid aiñ uba la don lypa ka jingnang jingtip ban leit sha Parliament.
U la ong ba ka Congress ka la ïoh ban phah MP la bun phew snem bad ki paidbah ki dei ban ailad ïa ka RDA ha kane ka kynti da kaba jied ïa u Bah Robertjune ban mihkhmat ïa ka Shillong parliamentary konstitwensi ha Parliament.
La ïoh ruh ka jingkren na u Bah KS Suting uwei na ki nongïalam ka HSPDP ha Mawkynrew uba la maitphang ïa ka nongrim jong ka RDA ha kaba ka UDP bad ka HSPDP ki ïatylli lang na ka bynta ban pynurlong ïa kiba bun ki mat ki jura jong ka jaitbynriew.
