Tura, Ïaïong 14
U kyrtong ka Congress ha kane ka ilekshon ban wan sha ka Lok Sabha na Tura, u Saleng A. Sangma ha ka Sngi U Blei u la pynïasnoh lang ïa ka BJP bad ka NPP kum kawei bad kajuh da kaba bynrap ba dei tang ka Congress ka seng kaba shah laitluid ïa ka jingmane blei – kaba lah ban wanrah jingsuk sha baroh ki jaidbynriew hapoh ka ri.
U Sangma u la kren ïa kane ha kawei na ki jingïalap ilekshon ha ka shnong ha Tura. Haba kynnoh ba ka NPP bad ka BJP ki long kawei bad kajuh, u Saleng u la pynkynmaw halor kiba bun ki jingshah ñiew beiñ da ka BJP bad ka RSS pyrshah ïa ki jaidbynriew rit paidbah kum ki Dalit, Adivasi kumjuh ki Khristan kiba shong ba sah ha ka ri. U la kynnoh ba kiwei pat ki seng Hindu kum ka JDU, Samajwadi Party, Shiv Sena, RJD ki pyrshah ïa ka BJP bad ki nongrim jong ka.
“Ki Myntri lajong kim sngewtynnad bad ka rukom treikam ka BJP bad kiba bun na ki, ki la ieh noh kam dang shen. U MP ka BJP kumjuh kiwei pat ki Myntri ki long katto-katne kiba la ieh noh kam mynta ka sngi,” u la kam. Haba kren halor ka CAA, kaba dang pynkhreh pyntreikam ïa ka, u Saleng u la ong ba katei ka aiñ kan treikam ha Shillong bad Tura.
“Baroh artylli ki jaka ki dei ki ‘headquarter jong ki thaiñ jong ki. Naba baroh ki kam ba donkam na bynta baroh ki distrik, ki sdang na kine ki ‘headquarter’, kan saphriang sha kiwei ki jaka,” u la ong da kaba bynrap ba ka jingpyllait ïa ki jaka ba hap hapoh ka Khyrnit ba 6 ka dei tang ka jingai daw bad ki jingmih na katei ka aiñ ka lah ban ksam shano-shano hadien-habud. U Saleng u la ong ruh ba ym don ILP hapoh ka Jylla, ha kawei ka liang kaba lah ban ïada na kane.
