Sydney, Iaïong:
Ki pulit ka Sydney ha ka Sngi Saitjaiñ ki la iathuh ba uwei u briew u la shah siat iap ha kawei ka jaka iadie-iathied ‘Mall’ hapoh Sydney bad la ioh jingtip ruh ba la don katto-katne kiba la shah dung tari bad kiba la mynsaw na katei ka jingjia. Ki pulit ki la ioh ia ka ‘phone’ na ka thaiñ Westfield Bondi Junction ha ka por kumba 4 baje nohphai sngi jong ka Sngi Thohdieng.
Na ka liang ki bor pyniaid katei ka thaiñ, ki la maham ia ki paidbah ba kin kiar noh shwa shipor na kaba leit sha katei ka jaka iew bad ban kiar ruh na kiwei ki jaka paidbah kiba ap jingma ha kum kane ka por.
Ki pulit ki dang bud-dien bad tohkit bniah ruh ia ki katto-katne kiba ïadon ha katei ka jaka ha ka por ba katei ka la jia ha katei ka sngi.
Hynrei tad haduh ka step Sngi Saitjaiñ ba la pyllait ia kane ka khubor, ki pulit kim pat shym la ioh jingtip eiei shaphang ka daw jong katei ka jingjia ha katei ka step.
Kumjuh ruh ki bor pyniaid ki la pynkynriah bad phah mih noh ia spah ngut ki briew kiba don ha katei ka jaka tang mar ia sakhi ia katei ka jingjia ha katei ka sngi.
Katba ki lad pathai khubor ki la iathuh ba ki dang don pat kiba dang sahkut hapoh katei ka jaka pynlong iew wat hadien ba katei ka jingjia ka la jai-jai.
La iathuh ruh ba 2 ngut ki briew kiba sakhi ia katei ka jingjia ha katei ka sngi, ki la iathuh ba ki la ïohsngew ia ka jingriew ki ktang suloi na katei ka jaka ha kaba ki la bna ruh ba la don sa ka jingshah dung tari jong katto-katne ngut ha katei ka jaka.
Tang mar kumta hi hadien kumba 20 minit eiei la iohi ia ki paidbah na katei ka jaka kiba la ia mih bad phet lymwir na katei ka jaka ban pyllait im ialade shimet- shimet.
Katba uwei pat u nongsakhi u la iathuh ba ha katei ka sngi u la iohi ia kawei pat ka long-kmie kaba la shu par bad dem pyllup ha ka madan bad leit phet rieh ha kawei ka dukan die ia ki mar ba rem dor kaba don ha katei ka jaka.
Ki pulit ka New South Wales ki la pyntip ba kin dang hap ban wad bniah bad bud-dien sani bha halor katei ka jingjia namar kim shym la iohi ne shem ia kitei kiba don kti ha katei ka kam watla ki la ialeh ban leit poi sha katei ka jaka ha ka por kaba khyndiat eh.
