Jowai, Ïaïong 14
Ka Mupliang Cricket Club ka la khur ïa ka jingjop hadien ba ka la lah ban pynliem noh ïa ka Cultural Youth Club Mowkaiaw da 9 run ha ka jingïalehkai jong ka lympung District Cricket League 2024 kaba la pynïaid da ka West Jaiñtia Hills District Cricket Association ha madan Khliehtyrshi Mini Stadium kaba la long ha ka sngi Saitjaiñ.
Haba phai sha ka jingïalehkai, ïa ka jingkynting pisa la jop da ka Cultural Youth Club bad ka la jied ban kawang bol (Field) nyngkong. Ka Mupliang CC kaba la tied nyngkong ka la lah ban tied 145 run na ki 23.5 over bad hap baroh ki wiket.
U Yoohimiootre Patweth u la tied 37 run na ki 34 tylli ki bol, u Dathrang Pariat u la tied 33 run na ki 33 tylli ki bol, katba na ka liang ka CYC u Todan Rymbai u la ïoh ban pynhap 3 wiket na ki 7 over kiba u la kawang.
Haba beh ïa katei ka thong kaba rit, ki nongtied ka CYC ki la lah ban tied tang 136 run na ki 35 over bad hap noh 9 wiket, kaba la pynlong ruh ïa ka ban shah rem noh tang da 9 run.
U Grateful Lyngkhoi u la tied 24 run na ki 27 tylli ki bol, u Pyniarmi Sutnga u la tied 20 run na ki 41 tylli ki bol katba na ka liang ka Mupliang u Defender Dhar u la pynhap 3 wiket na ki 7 over.
Ïa ka nam ‘Man of the Match’ la ïoh da u Defender Dhar jong ka Mupliang Cricket Club.
