Hyderabad, ïaïong:
Ka jingphah ïa ki khynnah sha skul ka la long kaba shem jingeh na ka bynta ki kmie ki kpa. Kumba la sakhi khamtam ha ki thaiñ nongkyndong, la ong ba ki khynnah kim ju kwah ban leit skul lada ym biang ne don kiei-kiei ki ban khring ïa ki ba kin leit sha skul.
Dei namar kane ka daw, ki bor ba dei khmih ki la sei ïa ki buit ki bor kumno ban lah khring ïa ki khynnah ba kin leit skul khamtam ha kane ka juk kaba mynta.
Shi bynta ban khring ïa kum kine ki jait khynnah, kawei ka skul ka la trei borbah ha kaba ka la hap ban pynkylla ïa ka skul baroh kawei ha ka dur ka rel.
Da kaba pynwandur ha kane ka rukom, kiba bun ki khynnah ki la kwah ban leit skul bad kane ka la khring shisha ïa ki.
Ha ka shnong Maredu Paka kaba don ha Ramanathapuram distrik, kawei ka skul Primary ïa kaba la tip kum ka My Chota Primary School la pynkylla sha dur ka rel.
Ka kamra jong u Principal ka skul ka don ha ka Engine kaba hakhmat.
Katba hynñiew tylli ki kamra kiba shadien ki dei kiba la shna bad phiah ha la ki bynta bad ïa ki khynnah la ai jinghikai ha kine ki kamra.
Ïa ki kynroh jong ki kamra klas la dro da ki dur kiba itynnad ha kane kane ka la khring bad pynlong khamtam ïa ki khynnah rit ba kin kwah ban leit skul.
Kane ka skul ka la kyntu ïa ki khynnah ba kim dei ban kyntait ne saitlah haba ki kmie ki kpa ki phah ïa ki sha skul. Kane baroh ka buit ba la wanrah ha kane ka skul ka la long shisha ka lad ban khring ïa ki khynnah sha skul khamtam ban pynïoh ïa ki ïa ki jingshah hikai bad la ïohi ba ki khynnah ki kmen bad sngewtynnad ban don ha kane ka skul.
U Principal jong kane ka skul u Sammi Reddy u la pynlong ïa kane ka skul ban sngew kumba shong ha ka rel kaba shisha kaba leit jingleit.
Kum shi bynta ban pynsngewthuh ïa ki khynnah skul, u la ong ba ka jingpule jong ki khynnah ka dei ban don ka thong kumba ka rel ka dei ban poi sha ka jaka ba ka thmu ban leit bad kumjuh ba ki khynnah kin poi sha ka thong jong ka jingjop ha ka jingim jong ki.
