New Delhi, ïaïong:
Ka jingshahkem jong ar ngut ki samla ha Rameshwaram kaba don ha Bengaluru ha kaba ïadei bad ka pynbthei bomb ka la pynpaw ba ki lehnoh Islamic State jong ka Iraq bad ka ISIS ne IS jong ka Levant ki la thmu ban nang pynïar shuh shuh ïa ki thapniang jong ka ha India, la ïathuh ka tyllong khubor kaba la wan na ki heh ka kynhun wad bniah.
Ka India ka la paw ba ka dei ka ri kaba don ïa shibun ki Muslim kiba shong shnong hapoh jong ka.
Kumba la sakhi, la ong ba ha India ki la don khyndiat eh ki jingpynrung dkhot ha ka kynhun ISIS haba ïanujor bad ka jingbun paid jong ki Muslim, khamtam ki samla.
“Ki lehnoh ISIS kin sa mih noh na Syria bad na Iraq shen ne kham hadien namar ka jingshah pynibor ha ki ri ka pyrthei, bad kine ki la kwah ban nang pynsuhthied ïa ki kynhun jong ka seng ha kylleng ki ri ka pyrthei,” la ïathuh ka tyllong khubor.
Ka tyllong khubor kaba la wan na ka kynhun wadbniah ka la ong ba ki nongkyrshan jong kine ki ar ngut kiba la shahkem kata u Mussavir Hussain Shazib bad u Abdul Matheen Taahaa ki dei kiba nabar ri.
U Ibrahim Khalil u la long u nongïalam uba dang thymmai uba la mih na Syria bad u la don ha Iraq ne Turkey.
Naduh u snem 2019, ka kynhun lehnoh ka la ïoh ban pdiang da kumba `. 12 lak ka pisa lyngba ki kor ki bor ban phah pisa, hynrei haduh katno la pyndonkam ïa ka pisa na ka bynta ka jingpynbthei bom ha Rameshwaram Cafe la dei ban wad jingtip lyngba ka jingtohkit, la ong ka tyllong khubor.
“Ki nongïalam jong ki lehnoh bar ri bad ka jingthong pisa ki bar ri ki dei ki jingpyntreikam ba ju leh ki lehnoh ISIS. Ki trai ri kiba leh ïa ki kam pynbthei bom barit ki la shahkem bad hap ban shong patok shirta jingim,”la ong ka tyllong khubor.
Kumba la ïathuh ka tyllong khubor kaba la wan na ka kynhun wad bniah, la ong ba naba ki samla ki ju kham shah pynngop, ïa mynta la ïaleh katba lah ban tehlakam bad ban ai ki jinghikai pynsngewthuh sha ki samla ha kaba ïadei bad kane ka bynta.
