Shillong, Ïaïong 14
U President ka Voice of the People Party (VPP), Bah Ardent M. Basaïawmoit u la kren shai ba ka seng kan ym pdiang satia ïa ki nongkyrshan kiba mlien ban timsih-timsang ha ki rynsan lad pathai bad kiba beiñ ba khoh ïa ki nongïalam niam.
Haba pynsngew ba mynta ki don ki briew kiba pyrshang ban pynbudnam ïa ka seng da kaba kynthoh da kiba sniew bad kren pynrem ïa ki nongïalam niam – Phadar, Pastor da kaba timsih-timsang ïa ki ha ki rynsan lad pathai bad ong pat “Ha U Prah…!!!”, u Bah Basaïawmoit u la ong ba ka seng kan sa leh eiei halor katei na bynta, bad kan ym shah ïa kiba kum kitei ki briew ban bteng ïa kitei ki jait kam.
“Lada dei ki nongkyrshan jong ngi ruh, ngim kwah ïa kiba kum kito ki nongkyrshan ban leit timsih-timsang hapoh ki rynsan lad pathai. Ngim kwah ïa kiba kum kito ki nongkyrshan ba kin leit beiñ leit khoh ïa u Phadar ne u Pastor,” la ong utei u nongïalam ka VPP haba ai jingkren ha ka jingïalang ïalap ilekshon ha Barato, West Jaiñtia Hills ha ka Sngi Saitjaiñ.
Haba kren shai ba ka VPP kam donkam ïa kiba kum kitei ki nongkyrshan, u la ong ba ka seng ka kwah ïa ki nongkyrshan kiba donburom naba naduh kaba sdang, ka la ong ba kan ïaid da ka akor ka burom bad namarkata ka seng kan sa shimkhia halor kane ka liang.
“Ngi tip ba kata ka dei tang ka buit jong ki nongshun jong ngi ban pynlong ba u paidbah un ong kumno une u ‘Prah’ u shu krem lymwir kumne…em u prah um ju leh shongshit. U ‘Prah’ u shit rhem hynrei um leh shongshit,” la ong u Bah Basaïawmoit.
Ha kawei ka liang, u la ong ba ka jingïaleh jong ka seng ka long pyrshah hapdeng ka jingbha bad ka jingsniew, bad ka seng kan hap ïaleh pyrshah ïa ka jingsniew bad ki kam thok kam shukor da kaba kynnoh ba kiwei ki nang tang ka thok ka shukor ban ïalam ïa u paidbah.
Haba pynpaw ka jingkyrmen skhem ha ki paidbah na bynta kane ka ilekshon ban wan, u President u la ong, “Ka jingrah kti jong phi ka sakhi ïa kata. Mano ban wan sha jingïalang bad rah kti ban pyni ba la rai lypa lymda dei ba la kut jingmut naduh ka mynsiem.”
Ha kajuh ka por, haba kyrpad ïa ki paidbah ban pyndonkam la ka jong ka hok da kaba leit thep ‘vote’, u la ong ba lada ka jingthep ‘vote’ ka kut noh, kata ym dei ban shah ïa ki shnong ban pynlut ïa ka ‘vote’ da kaba thep hi ïa ka ‘vote’.
“Lada thep tang 60 na ka 100, ieh kan sahkut kato kaba sah. Wat nym ai lad ïano-ïano…u paidbah u dei ban pyni ïa ka bor namar ngi im ha ka ri synshar paidbah,” u la ong.
Shuh shuh u Bah Basaïawmoit u la bynrap, “Balei ngin tieng ïa uta u Rangbah Shnong, balei ngin tieng ïa kita ki MLA, MDC ban byrngem. Balei ki nud ban byrngem…namar ki kheiñ biej ïa ki paidbah. Balei kim byrngem ïa uba nang ba stad ne uba stad ba shemphang. Namarkata ka VPP kan hikai ïa ki paidbah ba kin stad kin shemphang.”
Na ka liang ka seng ha ka Sngi Saitjaiñ ka la ujor ejahar ruh sha u Superintendent of Police (SP) ka East Khasi Hills halor ka jingshah kynthoh khlem akor ki nongïalam niam.
