New Delhi, Ïaïong 14 (UNI)
Ka seng BJP ha ka Sngi U Blei ka la kular ban pyntreikam ïa ka Uni-form Civil Code (UCC) ha baroh kawei ka Ri lada ka shah jied biang ban thaw ïa ka sorkar ba-thymmai hadien ka ilekshon MP Lok Sabha.
Ka UCC ka dei ka aiñ salonsar na ka bynta baroh ki nongshong shnong jong ka Ri bad ka dei ka aiñ ka bym shim na kano-kano ka niam ne jingngeit.
Hapoh ka UCC, yn pynbeit ïa ki aiñ kiba ïadei bad ka shongkha shongman, jingpyllait san shyieng, jingïoh pateng, jingting khun bad kiwei.
Haba pyllait ïa ka Mang Treikam ha shlem treikam jong ka seng, u Myntri Rangbahduh, u Narendra Modi, u la ong ba kane ka ‘Sankalp Patra’ kan pynkup bor ïa ki saw tylli ki païa jong ka Ri ba kynthup ïa ki samla, kynthei, ki baduk basuk, bad ki nongrep.
“Ka Ri baroh kawei ka la ap dnong lano ka BJP kan pyllait ïa ka Mang Treikam jong ka. Ka don ka daw kaba heh hadien jong kane: ha ki 10 snem ba la leit noh, ka BJP ka la pyntreikam ïa kawei-pa-kawei ka jingkular kaba ka la ai sha ki paidbah,” la ong u Modi.
Haba kren halor ka jingpynlong lang ha kajuh ka por ïa ki ilekshon ha ki snem ban wan, u Modi u la ong, “Ngin ïaid shakhmat bad ka saiñdur ban pynlong tang kawei ka ilekshon (One Nation, One Election). Ha kajuh ka por, ka BJP ka ñiew ba ka UCC ka long ka bakongsan na ka bynta ka Ri.”
Nalorkata, u la ong ba ka jingpyntreikam ïa ka Mang Treikam jong ka BJP kan sdang noh mardor tang shu dep pynbna ïa ka ‘Result’ jong ka ilekshon MP ha ka 4 tarik Jylliew. U la ong ruh ba ka sorkar ka la dep sdang ban pyntreikam ïa ka saiñdur aïu kan leh hapoh 100 sngi naduh ka sngi ba thaw ïa ka sorkar bathymmai.
Shuh shuh u la ong ba ka sorkar kan pynthikna ba baroh ki thliew ïing kin ïoh ïa ka lyer shet jingshet lyngba ki ‘Pipe (Piped Gas) bad ban ai bording lyngba ka bor jong ka Sngi (Solar Power) khlem jingsiew sha ki ïing ki sem jong ki baduk.
Haba kren halor ki kam ki jam ba ka Sorkar Pdeng ka la leh, u Myntri Rangbahduh u la ong ba ha kine ki 10 snem, kumba 10 klur ngut ki kynthei ki la don bynta bad ki Self-Help Group (SHG). “Ngi la rai ban ai jinghikai ïa kine ki SHG ha ka liang ka Information Technology, pule ka dangle, jingkoit jingkhiah, kam shangkai pyrthei.”
U Modi u la ong ruh ba na ka bynta ka BJP, ka “Ri ka kham khraw ban ïa ka seng”. U la pynkynmaw ba ka BJP ka la weng noh ïa ka Article 370 na Jammu & Kashmir bad ka la pyntreikam ïa ka Citizenship Amendment Act (CAA).
Katkum ka Mang Treikam, ka BJP ka la kular ba ka Sorkar Pdeng kan bteng ban ai khaw ‘ration’ eh na ka bynta sa san snem sha ki 80 klur ngut ki nongshong shnong hapoh ka PM Garib Kalyan Anna Yojana, bad kan pynleit jingmut ba ka Ri kan lah ban pyndap pynbiang dalade ha ka jingpynmih ïa ki dai, umphniang bam, bad ki jhur ki jhep khnang ban ïada ïa ki duk ki suk na ka jingkiew dor.
Nalorkata, u la ong ba ka sorkar kan sa pynïar shuh shuh ïa ka skhim Ayushman Bharat bad ïa ka jingshna ïa ki ïing baduk hapoh ka PM Awas Yojana. U Modi u la ong ruh ba ka sorkar kan bteng ban pynpoi umbam umdih ha man ki thliew ïing.
Na ka bynta ki nongrep, ka BJP ka la kular ba kan bteng ban ai pisa `6,000 sha man la ki nongrep ha ka shi snem bad kan pynkhlaiñ ïa ka ‘Crop Insurance’ da kaba pyndonkam da ki kor ki bor.
