Shillong, Ïaïong 14
Ka Rangdajied United Football Club ka la lah ban pynliem noh ïa ka Shillong Lajong Football Club ha ka lympung Shillong Premier League (SPL) 2023 da 2-1 kol ha ka jingïakhun kaba la long ha SSA Stadium, First Ground, Polo ha ka Sngi Saitjaiñ.
Ha shwa jong kane ka jingïalehkai, ka Rangda-jied United FC bad ka Shillong Lajong FC ki dei ki ar tylli ki kynhun kiba la dep ban jop ha baroh 3 tylli ki jingïalehkai. Kumta ka jingïakhun hapdeng kine ar kynhun ha ka sngi Saitjaiñ ka la long kaba itynnad bad ïakhaid bha namar baroh ar liang ki la ïakhun tyngeh ban bteng ïa ka jingkhur jingjop.
Haba phai sha ka jingïalehkai, tang ha ka minit kaba 18, ka Rangdajied United ka la ïoh ïa ka kol kaba nyng-kong kaba la khyrwit da u Arlangki Nongsiej hynrei tang hadien 6 minit, kata ha ka minit ba 24 ka Shillong Lajong FC ka la ïoh ban pynphai ïa kane ka shi kol lyngba u Deiborme Tongper bad haduh ba kut ka kylla step ki la ïakhaid da mar shi kol.
Haba bteng ïa ka kylla miet, ka jingïakhun ka la nang itynnad shuh shuh, ha kaba baroh arliang mamla ki la ïakhun tyngeh bad pyrshang ban pynkhih jar. Dei tad ha ka minit kaba 79 ba ka Rangdajied United ka la ïoh ïa ka kol kaba ar ba la thep da u Ksankupar Khongmalai bad pynjop syndon ïa ka jingïalehkai da 2-1 kol.
Lyngba kane ka jingjop, ka Rangdajied United FC ka la kamai 12 point na ki 4 tylli ki jingïakhun bad ban bat ïa ka kyrdan kaba nyngkong, katba ka Mawlai SC kaba la ïoh 10 point ka la don ha ka kyrdan kaba ar bad ka Shillong Lajong kaba la ïoh 9 point ka la don ha ka kyrdan kaba lai.
