Pakistan, Iaïong:
Ki pulit ka Pakistan ha ka Sngi Saitjaiñ ki la iathuh ba 9 ngut ki briew ki la shah rahbor ha ki runar kiba kieng atiar bad kiba la leit ban bat ia kawei ka bos katba ka dang poi leit iaid lynti na ka thaiñ Southwest jong ka Pakistan ha khappud ka Afghanistan bad Iran.
Tad haduh ka step Sngi Saitjaiñ ba la pyllait ia kane ka khubor, la ong ba ym shym la don ba kam ne shim jingkit khlieh halor katei ka jingjia kaba la jia ha ka miet Sngi Thohdieng hapoh jong ka nongbah Balochistan, kaba don sha ka phang Southwest jong ka Pakistan.
Namar la ong ba ki kynhun lehnoh na katei ka nongbah Balochistan ki ju pyni ia ki kam thombor ba triem ha kylleng jong katei ka thaiñ mynta da ki phew snem.
Ha katei ka miet, la ong ba katei ka kynhun jong ki ‘riew kieng atiar ka la bat bad pynsangeh ia katei ka bos kaba poi sha katei ka thaiñ hapoh ka distrik Noshki bad la ong ba katei ka kynhun runar ka la tan ia 9 ngut kiba shong na katei ka bos hadien ba ki la ioh jingtip ba kitei ki 9 ngut ki dei na ka thaiñ Punjab jong ka Pakistan. Baroh kitei kiba shong ha katei ka bos la ong ba ki dei kiba mut ban leit sha Taftan.
