Tokyo, Iaïong:
Katkum ki khubor la ong ba ka jaka die ia ki mar ba rem dor ha Japan ka la pyntip ba kawei ka khuri ksiar kaba shongdor kumba 10 Million Yen ($65,000) ka la shah tuh na katei ka jaka ha ka Sngi Palei. Kane ka wan jia hadien ba la sei ia katei ka khuri na ka synduk ba la thep bad sop bha.
Katei ka khuri ka dei kaba la shna bad pynwandur da ka ksiar 24-Carat, kaba long ka ksiar ba paka bad ka bym shym la khleh ia kiwei ki jait jingkhleh ban pyndap lang ia ka ksiar. Katei ka khuri ksiar ka dei kaba la wan poi na kawei ka dukan die ia ki mar ba rem-dor na Takashimaya jong ka Tokyo.
Katei ka khuri kaba la shah tuh, ka long kawei na ki jingdie ba remdor tam ha katei ka dukan, kaba don ruh ia ka dur kaba ishongkhia haduh katta bad kaba phalang katkum ka dor jongka hi.
Ia katei ka khuri la buh hapoh kawei ka synduk kaba sngur bad kaba lah ban iohi lyngba hynrei kaba la plied lypa khnang ba kan kham pynsuk ia ki paidbah nongthied ba kin ioh ban sei bad ban bat ha ka kti ba kin sngewthuh ia ka dor bad ka jinglong jong ka.
Katkum ka video ba la ioh ring dur na ki Camera CCTV kiba la pyndait ha katei ka dukan, la iohi ia uwei u briew uba kit ia kawei ka pla bad uba la phet krad bak tang mar ia ioh shim tuh ia katei ka khuri na katei ka jaka ba la buh ia ka.
Haba iadei bad kane, ki bor pyniaid bad ki pulit katei ka thaiñ ki dang ialeh ban bud-dien bad ban thwet ia utei u briew uba la tuh bad rah ia katei ka khuri ha katei ka jingjia.
