Shillong, Ïaïong 14
Ka lyer jong ka jingsngew shongshit bad kaba don jingkyrmen ka la tap miar ïa ka Madan Ïewrynghep ha Laitumkhrah da ka jingwan jong ka International Shillong Trade Fair kaba 21 kaba la pynkylla dur ïa kane ka madan sha ka jaka ïadei-ïathied kaba khring tam ha kaba ki nongseng kam lajong ki ïoh ka lad ban ïaphylliew jingmut halor ka khaïi-pateng bad ka jingpyndonkam ïa ki kor ki bor ha ka khaïi-pateng. Kane ka ïew bah kaba shisien shisnem, ba la pynlong da ka ITFAA, ym tang ba ka long kawei na ki tamasa ha ka almanak jong ka sor Shillong hynrei ka long ruh ka shalyntem na ka bynta ka ïoh ka kot bad ka jingïaphylliew jingmut ha ka kam khaïi-pateng.
Ha ka prokram ai khublei kaba la long ha ka Sngi Thohdieng ha ka madan ba long kane ka ïew bah, u M S Sangma, Director ka Information and Public Relations jong ka sorkar Meghalaya, u la ïaroh ïa ka Dorbar Shnong Laitumkhrah Pyllun kaba la kyrshan ha kaba pynlong ïa ka Trade Fair. U banjur ïa ka jingdonkam jong kum kine ki jingsdang ban wanrah ka jingkyrmen bad ban pyntyllun ïa ka ïoh ka kot, khamtam hadien jong ka khlam Covid.
U Deputy Commissioner ka East Khasi Hills, u S.C. Sadhu u la pynsawa kijuh ki jingsngew ha ka por ba u leit jngoh ïa kane ka ïew bah ha ka 6 tarik u Ïaïong, ha kaba u la ïaroh ïa ki nongpynïaid kiba la trei shitom ban saiñdur sani ïa kane ka ïew bah bad u la ai jingmut ba kum kine ki ïew lah ban pynlong man ka snem. U la banjur ïa ka jingdonkam ban pynsngewthuh bad ai jinghikai ïa ki briew ka Meghalaya kumno ban nang kyntiew ïa ka khaïi-pateng lyngba ka jingpyndonkam ïa ki kor ki bor ka juk mynta.
Ki Rangbah Shnong ba rangbah jong ka Laitumkhrah Dorbar Shnong Pyllun, u Bah P S Nongkynrih bad Bah Andrew A Jyrwa, ki la pynpaw ïa ka jingmyntoi jong ka Shillong Trade Fair ha kaba kyntiew ïa ki shnong ki thaw bad ka ïoh kam ïoh jam ki samla. U Bah Theorydore Myrboh, uba mihkhmat ïa ka Dorbar Shnong, u la ïaroh ïa ka ITFAA, ba lyngba ka Trade Fair, ka la lah ban kyntiew ïa ka Meghalaya kum kawei na ki jaka jngoh kai ba pawnam bad ruh kum ka shlem khaïi. U kyrpad ïa ki nongpynïaid ban pynthikna ba ha ka sien wan pynlong kaba bud, ka Trade Fair kan long kaba kham ishongkun, da kaba ban ruh ba kane ka Trade Fair ka la long kum ka nongrah ktien sha kiwei pat ki ri na ka bynta ka jylla.
Ka Kunjana Mu-Miang, ka nongïashimbynta na Thailand kaba ju ïashimbynta ha kum kine ïew bah ka pynpaw ïa ka jingsngewkmen ban ïoh wan biang sa shisien sha kane ka sorbah kaba ka sngewtynnat eh. “Nga ai khublei ïa ka Dorbar Shnong bad ka ITFAA kaba lah ban wanrah biang ïa ka Shillong Trade Fair hadien 5 snem. Nga don ki nongthied-nongpet na Shillong kiba ha baroh kine ki snem ki la kylla long ki paralok jong nga bad kaba la nang pynkhlaiñ ïa ka jingïadei hapdeng ka India bad Thailand”.
