Shillong, Ïaïong 14
U MLA barim ka NPP na Sohïong, Bah Samlin Malngiang, u la kynnoh ïa u Bah Ardent M Basaïawmoit ba u long kum u lymbit namar u la dep phet na ka UDP, HSPDP, Congress bad mynta u la bat ïa ka kam Presi-dent ha ka seng Voice of the People Party (VPP).
Ïa kine ki kyntien u Bah Samlin u la kynnoh ha ka jingïalang ka NPP ban pan jingkyrshan ïa ka kyrtong ka NPP ka Kong Ampareen Lyngdoh kaba la long ha Sohïong ha ka Sngi Saitjaiñ ha ka jing-ïadonlang ki nongïalam ba hakhmat ka NPP bad ki nongkyrshan.
Kane ka jingjubab u Bah Samlin ka dei namar u Bah Ardent M Basaïawmoit u la wan kynnoh ïa u Bah Samlin ha jingïalang ka VPP ha Sohïong namar u dei uba haram haba u shet kylla ïa u mar shu jop ïa ka ilekshon MLA ha u snem 2018.
U Bah Samlin u la pynkynmaw haba u Bah Ardent u la long CEM ha KHADC u la leit bad u paralok ban khublei kti bad hadien ba la rem ruh u la leit biang ban khublei kti, bad hangne u Bah Ardent u la pan jingïarap ban pynïoh jaka ha Sohïong ban pynshai ïa ka VAB kaba dei ka kam jong ki Rangbah shnong hynrei u la shu ai ïa ki kyrteng ki ‘riew rangbah.
“Nga iehnoh ïa ka kam sorkar dei hadien ba nga ïasyllok bad ki bahaïing ym dei ba phah u Bah Ardent haba ngan ïakhun ïa ka ilekshon MDC shiteng samoi hadien ba la hiar shuki u MLA barim ka Sohïong” u la ong.
U la ïathuh hadien ba u la jop ïa ka ilekshon MLA ha u snem 2018, dei u Bah Ardent uba phah ban ïatreilang bad ka UDP ban thaw ïa ka sorkar hynrei mar shu wan u Bah Vincent Pala bad u Zenith Sangma u la phah sangeh noh ban thaw ïa ka sorkar bad ka UDP hynrei ha kato ka por ki khlem sngap shuh namar la dep pynbeit ban bamsmai noh.
U la kynnoh ruh ba u Bah Ardent u long kum lymbit namar u la dep rung sha ka UDP, HSPDP, Congress bad mynta ha ka seng VPP.
Nangta u la ai nuksa da kaba u la ïathuh ruh ïa ka khana shaphang u lymbit lada leit bad ki sim u ong ba don ki sner, lada leit bad ki mrad u ong ba don ka met ba don shñiuh bad ki bniat kiba nep. Dei hangne ka jingsneng ka ong, “Mano ban shaniah ïa uba shet kylla”
Shuh shuh u Bah Samlin u la ong ba u Bah Ardent u dei shisha u khawpud namar u la leit shah thngan halor ka bhah thungkam bad ïakhih ïa ka Lokayukta, hynrei ha ïingdorbar u khlem kren eiei bad la kren pynban da u Dr. Mukul Sangma bad hangne u la ong ba ka TMC bad VPP ki dei shipara.
