Ludhiana, ïaïong:
U khun jong uwei uba la shah kynnoh ba u la pynïap ïa ka Myntri Rangbahduh jong ka ri ka Indira Gandhi un sa ïakhun ha ka ilekshon Lok Sabha na Faridkot konstitwensi ha Punjab kum u kyrtong shimet. U Sarabjeet Singh Khalsa (45), uba dei u nongshong shnong jong ka Phase 5 Mohali, ym pat leit jngoh ïa ka Faridkot hynrei la pynshisha ba kiba bun ki briew na Parliamentary konstitwensi ki la pynbor ïa u ba un ïakhun ïa ka ilekshon.
“Nga la rai ban ïakhun na Faridkot ha u bnai ba la leit. Kiba bun na ki nongshong shnong jong ka Faridkot ki la wan sha nga bad ki la ong ïa nga ba nga dei ban ïakhun ïa ka ilekshon, ha kaba nga la shim ïa ka rai ban ïakhun. Ngan sa leit sha ka konstitwensi ha ka taïew ban wan,” la ong u Khalsa ha ka jingïakren bad ki nongthoh khubor. U Khalsa u dei u khun jong u Beant Singh.
U Beant Singh bad u Satwant Singh, kiba ha katei ka por ki dei ki nongsynran jong ka Myntri Rangbahduh, ki la pynïap ïa ka Gandhi ha ka 31 tarik, Risaw, 1984 ha ka ïingsah jong ka.
