Kozhikode, Iaïong:
Katkum ki khubor, la ong ba ki kmie ki kpa jong uwei u briew ki dang ap khmih lynti ia ka jingwan phai iing jong u khun uba don ha ka jhad kaba don jingiadei bad ka Israel bad kaba la shah bat noh ynda poi ha ki bynta ka thaiñ ‘Gulf’.
La ong ba utei u khun jong ki uba la ithuh kum u Shyamnath, u long uwei napdeng ki 17 ngut ki nong India kiba don lang ha katei ka jhad kaba la shah bat noh ha ki bor pahara jong ka Iran hajan ka Strait of Hormuz ha ka Sngi Saitjaiñ.
Kumta, la ong ba ki kmie ki kpa jong u Shyamnath kiba kynthup ia u Vishwanathan bad ka Shyamala kiba dang shu bna shen ia katei ka khubor, ki la iathuh ba dang ha ka Sngi Saitjaiñ ki dang ioh ban iakren bad u. Tang hadien katto-katne kynta, ki la ioh ia ka phone na ki bor pyniaid jong katei ka jhad na Mumbai kiba la pyntip halor katei ka jingjia kaba la pynkyndit ia ki, ha kaba kim don lad ban leh eiei hynrei ki la shu ap khmih lynti bad kyrmen skhem da kaba duwai jur na ka bynta u khun jong ki ba un poi suk- poi saiñ sha ka jaka ba u mut ban leit.
Kitei ki bor pyniaid jong katei ka kompeni na Mumbai bad kiba iatrei lang bad katei ka jhad ki la iathuh ba haduh katei ka miet Sngi Saitjaiñ, kim pat shym la ioh ban iakren bad kitei ki bor pyniaid kiba don ha katei ka jhad, bad kumta kim lah ban leh eiei halor katei ka jingjia hynrei ban ap sa tang da ioh ia ka jingpynshai bad ka khubor na ki bor pyniaid na kitei ki jaka ba la ioh bat ia katei ka jhad.
U Shyamnath u dei na Velliparamba kaba don sha ki thaiñ Shatei jong ka Kerala bad u trei kum u heh karikor ha ka ‘MSC Aries’ la 10 snem mynta.
U la leit jngoh ia ka shnong trai lade ha Kerala dang ha u Nailur mynshem snem (2023) .
Kitei ki bahaiing jong u ki iathuh ba nalor jong u Shyamnath, 2 ngut kiwei pat kiba ïadon lang ha katei ka jhad ryngkat bad u khun jong ki, ki dei na ka distrik ba marjan na Palakkad bad Wayanad.
Nalor jong kine ki nong India kiba don ha katei ka jhad, la ong ba ki don sa kiwei pat ki jaitbynriew kiba kynthup ia ki nong Philippines, Pakistan bad ki nong Russia ia kiba la shah bat lang noh ha kitei ki bor pahara jong ka ri Iran ha katei ka jingjia.
Hadien kane, ki heh Myntri ka Sorkar India ki la pynpaw ka jingsngewkhia halor katei ka jingjia bad ki la kular ba kin ialeh ban shim khia na ka bynta ka jingshngaiñ bad ka suk- ka saiñ jong u khun katei ka longiing bad kumjuh ruh ia baroh kitei ki nong India kiba ïadon lang ha katei ka jingjia.
La ong ba ruh ba ki heh na India ki la ioh ban iakren bad ki heh na Iran halor ka jingpyllait noh ia kitei ki 17 ngut ki nong India kiba don ha katei ka jhad Cargo ‘MSC Aries’.
Kumjuh ruh na ka liang ki bor pyniaid ka MSC (Mediterranean shipping Company), ki la pyntip ba ki dang ialeh katba lah ban peit-thuh bha ia ka jinglong- jingman haba iadei bad katei ka jingjia bad ban pyllait noh ruh ia baroh kitei kiba shong hapoh katei ka jhad bad kiba la shah bat noh ha ki bor pyniaid ka Iran ha kane ka por.
