Shillong, Ïaïong 15
Ka jingwanrah ka Sorkar BJP ïa ka Common University Entrance Test (CUET) kaba la ktah shi kat dei ïa ki samla pule ban ïoh rung ha ki jaka pule ban bteng ïa ka jingpule kaba kham shalor yn sa pynduh pyndam noh da ka Congress.
Ïa kane la pynpaw da u MP ka Shillong uba dei ruh u kyrtong ka Congress ha kane ka ilekshon Lok Sabha u Bah Vincent H Pala haba pynsngew sha ki paidbah ïa ka nongrim bad ki mat ilekshon jong ka Congress.
U Bah Pala u la ong ba ka eksamin Common University Entrance Test (CUET) ka la ktah ïa ki samla pule ha kane ka Jylla ba kin ïoh pule ha ki skulbah wat lada ki la pass bha ha ka kyrdan pule jong ki na ki kolej.
“Ngi kwah ban pynduh pyndam noh ïa ka CUET namarba ka jingïoh rung ban pule ha ki skulbah bapher-bapher ka dei ban long katkum ka jingpynïaid ki skulbah ym katkum ka Sorkar,” la ong u Bah Pala.
Une u nongïalam ka Congress u la ong ba ka jingdon ka CUET ka la pynduh ïa ka hok jong bun bah ki samla pule ban ïoh leit pule ha ki skulbah, bad na ka liang ka Congress ka sngewdei ba ka hok ban rai haba ïadei bad ka jingïoh ban leit pule ka shong ha ki skulbah ym ba kan shong ha ka Sorkar.
Lah ban pynkynmaw ba bun bha ki samla pule ha kane ka Jylla ki la mad jingeh ban ïakhun ïa ka CUET bad don ruh ki samla kiba hap leit thoh eksamin shabar Jylla ha kaba ki ïoh jingtip ha ka por kaba lyngkot.
Haba ïadei bad ka ïoh kam ïoh jam, u Bah Pala u la ong ba ka Congress lada ka wan ha ka bor, kan pyntikna ba ka tulop jong ki samla kiba la pyndep ïa ka jingpule kam dei ban duna T. 1 lak shisnem.
U Bah Pala u la ong ba ka Congress ka kular ban kyntiew ïa ki ‘rang bad ki ‘thei ïalehkai bapher bapher khamtam eh kito kiba wan na ki longïing ba duna ka ïoh ka kot da kaba ai jingkyrshan T. 10,000.
Ka Congress ka kular ruh ban pynbha ïa ki kam khaïi ha khappud bad ki ri ha khappud ka India kum ka ri Bangladesh bad kiwei khnang ban kyntiew ïa ka ïoh ka kot ki nongshong shnong.
