Jowai, Ïaïong 15
U President ka VPP, Bah Ardent M Basaïawmoit u la ong ba ka NPP ka kwah ban pynneh ïa ka Jaiñtia Hills Autonomous District Council ne ka JHADC da kaba pynduh tulop ïa ki nongtrei jong ka da ki phew bnai.
U Bah Ardent u la ong ïa kine kyntien ha ka jingïalang ïalap ilekshon na bynta u kyrtong jong ka VPP ha Iawthymme Ladthadlaboh Jowai ha ka Lah Sngi U Blei mynta ka taïew.
U President ka VPP u la ong ba ka VPP ka dawa ban pyntreikam ïa ka Article 371 ha ka Jylla Meghalaya khnang ban ïada ïa ka Jylla na kano-kano ka jingpyntreikam ïa ki aiñ jong ka Sorkar Kmie.
U la pynshai ka jingwanrah ïa ka Article 371 kan nym pynduh ïa ki District Council kiba don ha ka Jylla haba pynphai ktien ïa ka jingkynnoh jong ka NPP ba ka VPP ka thmu pynduh noh ïa ka District Council. U la ong ruh ba ka VPP ka ïeng ban pynkhlaiñ bor shuh ïa ki District Council.
Kum ban shu kdew hangne, ki nongtrei jong ka JHADC hapoh ka lama jong ka JHADC Staff Association ka la ujor da ka ejahar Contempt Petition No Cont.Cas(c) No.37 of 2023 ha ka High Court jong ka Meghalaya na ka daw jong ka jingbym ïoh tulop da ki phew bnai. Haduh mynta ka jingbishar ïa katei ka ejahar ka dang ïaid shakhmat.
