Shillong, Ïaïong 15
Ka kynhun ïalehkai athletics ka Jylla kam shym la lah ban khur takma na ka lympung ïalehkai 67th National School Games 2024 kaba la poi sha kaba kut ha Patliputra Sports Complex, Kankarbagh, Patna.
Kane ka lympung kaba la sdang naduh 6 haduh ka 9 tarik mynta u bnai, ka tnat ïalehkai ka la sei haduh 15 ngut ki khynnah Under-17 shynrang bad kynthei ban leit ïashim bynta ha la ki jong ki jingïakob bapher bapher, hynrei kim shym la lah ban kynjoh sha ka thong bad ki la hap ban wanphai thylli sha la ïing.
Na ka liang ki coach ki la pynpaw ba kane ka jingbym lah ban ïalehkai bha ki khynnah ha katei ka lympung ka dei na ka daw ba ki khynnah kim shym la ïoh ban pynkhreh bha ïalade namar ki dang shu dep ïa ka eksamin SSLC.
Ki khynnah kiba la ïoh ban ïashim bynta ha katei ka lympung ki kynthup ïa ka Melibad Kro (Javelin Throw & Discus Throw), Turoi Phawa (Long Jump & 100 mts), Rukini R.T Dkhar (800 mts & 400 mts), Enriyana G. Momin (Long Jump), Kasanchi-Donesa J. Marak (100 mts), Lynti-jingkyrmen K. Jahrin (3000 mts), Anus-kha Majong (High Jump) bad u Sibilda Maring (High Jump). Katba na ka liang ki shynrang ki long u Henry Yoga A. Sangma (100 mts), Bettingstar N. Marak (Long Jump), Ïoh Ï Ksan Lyngdoh (100 mts & 200 mts), Percioustar Bey (High Jump), Kner-lang Phawa (1500 mts & 3000 mts), Ram Shylla (1500 mts & 3000 mts) bad u Rones Taro Long (Jump & High Jump).
