Jaipur, ïaïong:
Ka General Secretary jong ka seng Congress ka Priyanka Gandhi Vadra ha ka Sngi U Blei ka la ñiew ba ka jingkyrduh kam bad ka jingkiew dor ki mar ki mata ki la buh jingeh bha ïa ka ri, bad buh jingkylli ïa ka sorkar kmie ha kaba ïadei bad kine ki ar tylli ki mat.
Ka nongïalam jong ka seng Congress ka la kren ïa kine ki kyntien ha Jalore kaba don ha Rajasthan katba ka dang ai jingkren ha ka jingïalang paidbah ban ai jingkyrshan ïa u Vaibhav Gehlot, u kyrtong jong ka seng Congress na Jalore-Sirhot Lok Sabha konstitwensi.
Ka Priyanka Gandhi ka la kyntu ïa ki nongthep vote ba ki la dei ban pyrkhat bha ha shwa ba kin ñion ïa u budam ha ka sngi thep vote. Ka nongïalam jong ka seng Congress, khlem da pynpaw kyrteng, ka la ong ba ïa kiba bun ki jingïalang paidbah la pynlong na ka bynta ban pynsngewthuh ïa ki paidbah halor ki mat kiba buh jingeh ïa ka ri.
“Ka jingkyrduh kam ka la nangjur, hynrei ym shym don mano-mano ruh ban kren halor jong ka. Phi la pyni ba ka ri ka pyntreikam bad ba baroh ki ïakmen.” “Haba ngi ïohi ba ki President bad ki Myntri Rangbahduh jong kiwei pat ki ri ki wan sha India na ka bynta ki prokram kiba kham kongsan kum ka G-20 Summit, ngi sngew sarong shaphang kata. Ha kaba ïadei bad kane, ki briew jong ka ri ki baduk ki dang shah ktah na kiba bun ki jingeh, bad kane ka dei ka jingshisha,” la ong ka nongïalam jong ka seng Congress.
Ha ka jingai jingkren, ka Priyanka Gandhi ka la ong ruh ba kiba bun ki jingkular kum ka jingthep pisa kaba ` 15 lak haman ki Bank Account bad ban ai kam sha 2 klur ki dang sah khlem lah pynurlong”.
