Shillong, Ïaïong 15
U President ka Voice of the People Party (VPP), Bah Ardent M. Basaïawmoit ha ka Lah Sngi U Blei u la ujor ejahar pyrshah ïa u MDC barim ka Umsning halor ki jingkynnoh ba khlem nongrim pyrshah ïa u.
Katkum katei ka ejahar, u Bah Basaïawmoit, u la ong ba u Bah Don Sumer, uba dei ruh u dkhot ka National People’s Party (NPP) ha kawei ka jingïalap ilekshon ka seng, u la kynnoh ïa u halor ka jingpyndonkam pisa bakla ha ka por ba u (Basaïawmoit) u dang long kum u Chief Executive Member ka Khasi Hills Autonomous District Council (KHADC).
“Ka jingkynnoh pyrshah ïa nga ka long kaba bakla, kaba khlem nongrim bad ka bym dei,” la ong u nongïalam ka VPP ha ka ejahar ba la ujor ha thanat Sadar.
“Da kum kine ki jingkren ha ki rynsan paidbah, ki la mih ki jingkynthoh bad ki jingthoh bym ïahap pyrshah ïa nga, u nongmihkhmat ba la shah jied sha ka ïingdorbar thawaiñ ka Jylla. Ka long ruh kaba donkam ban kdew ba kiba kum kine ki jingkren ki la wan ha ryngkat ka jingthmu ban pynjah burom, ñiew beiñ bad pynsaphriang ïa ki jingtip ba lamler sha u paidbah ba bun ba lang,” u la ong.
Shuh shuh u la ong ba kum kine ki jingkren ki ïalam sha ki kam be-aiñ hapoh ka kyndon 499 bad kiwei-kiwei ki kyndon ba ïahap jong ka Indian Penal Code, 1860.
“Haba ïadei bad kane, ngi kyrpad ba phin leh eiei mardor katkum ka aiñ, bad ba ka sabut ka dei ban don bad u briew uba la pynmih ïa kitei ki jingkren,” la ong u Bah Basaïawmoit.
