Imphal, ïaïong:
Ka Congress ha Manipur ka la buh ka jingkyrpad na ka bynta ban pyntreikam ïa ki shipai ka sorkar kmie ha ki thaiñ shi sngi hadien ba ka la don ka jingsiat kaba la jia ha ka por ba don ka jingïalang paidbah ha Moirang ha ka 12 tarik, Ïaïong.
Kane ka la jia ha ka 12 tarik, Ïaïong ha ka por 3:30 janmiet ha ka por ba dang don ka jingïalang paidbah ha kaba ïadei bad ka ilekshon ha Phairenbam Mandop kaba don ha Phairenbam Leikai, P.S. Moirang kaba hap hapoh ka Moirang A/C.
Kane ka jingïalang ba la pynlong hapoh ka jingïalam jong u P. Sharatchandra Singh (Retd. IAS bad u Ex-MLA), ka la pynlong ïa ka jingleit jngoh jong u kyrtong jong ka seng Congress ban ïakhun na ka bynta ka 1-Inner Manipur Parliamentary konstitwensi. Ha kane ka prokram, kumba la antad la ong ba ki la don kumba 400 haduh 500 ngut ki briew, kiba la leit ban ïashim bynta, ha kane ka por ba dang pynlong ïa ka jingïalang kynsan-kynsan ka la don ka jingthombor jong ki runar.
Ki runar ki bym shym la lah ban ithuh ki la siat da kumba 5 haduh 6 sien sha ka phang ba don ki ‘riewpaidbah, ha kaba kane ka la pyntieng pynsyier bad pynmareh ruma ïa ki paidbah kiba don bynta ha ka jingïalang. Kine ki runar ki la byrngem ruh ïa ki nongpynïaid jong ka jingïalang bad kumjuh ïa ki briew kiba leit ïashim bynta ha ka jingïalang, ki la dawa ba la dei ban mih noh kloi na ka lympung ba la pynlong jingïalang, ha kaba kane ka la pynthut ïa ka jingïalang paidbah.
Napdeng ki nongïalam kiba la don bynta ha ka Election Interaction Programme ki kynthup ïa u Girish Chodankar (AICC In-charge Manipur), u K. Meghachandra (MLA bad u President, MPCC), u O. Ibobi Singh (MLA & Ex-Chief Minister bad u nongïalam ka CLP Leader, Manipur), u K. Ranjit Singh (MLA bad u Dy. CLP Leader), Th. Lokeshwar Singh (MLA and Party Chief Whip), Anil Tan (Minority In-charge, AICC), Rajesh Sethi (Minority In-charge, AICC), bad u Angomcha Bimol Akoijam (INC Candidate, 1-Inner Manipur Parliamentary Constituency).
Ha kaba ïadei bad kane ka jingjia, ka Congress ha Manipur ka la dawa ba la dei ban pynshitom da kaba tyngeh ïa kine ki runar kiba la don bynta ha kane ka kam thombor, ha kajuh ka por la dawa ruh ban pyntreikam da ki shipai ka sorkar kmie na ka bynta ban pynkhlaiñ ïa ka jingpahara ha kiba bun ki thaiñ jong ka Manipur.
Naba la jan sdang ka ilekshon, ka la don ka jingsngewkhia ha kaba ïadei bad ka jingdon jong kine ki kam pyntriem, bad kyrpad ïa ki bor ba dei khmih ba ki la dei ban ai hukum ban pynbiang ki lad jingïada na ka bynta ki nongthep vote bad kumjuh ïa ki kyrtong, khnang ban pyntikna ba kan don ka jingshngaiñ ha baroh ki liang khamtam ha ka sngi thep vote.
