Nongstoiñ, Ïaïong:
U samla Roykupar Synrem, President Rangbah ka Hynñiewtrep Youths’ Council, Sengkmie u la ong ba wat ai pat ba kane ka por ban ïa jied ïa kita ki nongmihkhmat, ki nongthaw aiñ ki jong ngi ka dei ka por ba ngi ngin ïa kynnoh ngin ïa kynthoh para ma ngi.
U samla Roykupar u la kren bad pynpaw ïa kane ha ka jingïalang pyntian smai ïa ki nongkitkam kiba thymmai jong ka HYC Nongstoiñ Circle na ka bynta ka samoi trei kam 2024-27. Ha kane ka sngi u samla Redyfernandy Sun u la shah jied kum u President bad u samla Ïainehskhem Ryntathiang kum General Secretary lem bad kiwei pat ki dkhot ki la shah pynskhem bad pyntian smai kaba la long ha ka Sngi Saitjaiñ jong ka taïew ha Mecofed Hall New Nongstoiñ.
“Kaba nga kwah ban pashat jingmut ym dei tang ïa ki dkhot ka HYC hynrei ka iwei pa iwei ki dkhot jong ka jaitbynriew, ka jaitbynriew kaba ïeng ha ki lai tylli ki mawbyrsiew, ka tip kur ka tip kha, ka tipbriew ka tipblei bad ka kamai ïa ka hok , phewse ka jingsngewsih ban ïohi ha kine ki khyndiat sngi kiba mynta, kata ka jaitbynriew kaba tip briew tip kur kaba tip kha, kaba tipbriew kaba tipblei ka la kylla long pynban ka jaitbynriew kaba shu shongshit khlieh biej”, la ong u Bah Roykupar.
U Bah Roykupar u la ong ruh ba lada phi peit ïa ki jingjia kiba jia ha kine ki sngi kiba mynta, ka dei ka jingsneng kaba nga kwah ban kren ïa ki dkhot jong ka seng HYC bad ïa ngi lang baroh ki dkhot jong ka jaitbynriew.
“Jia aïu ïa ka jaitbynriew tipbriew tipblei, jia aïu ïa ka jaitbynriew tip kur ka tip kha; kaba sngewsih ka long ba kita ki dkhot jong ka jaitbynriew kiba ngi ong ka jaitbynriew tipbriew tipblei haba ngi peit ïa kita ki jinglong-jingman ha kine ki sngi, ngi ïohi ba ki briew ki shongshit buaid ilekshon, shongshit buaid seng saiñ pyrthei, shongshit buaid kyrtong ki pynmih ïa ki kyntien kiba sngewlehraiñ pyrshah ïa ki nongïalam balang ki jong ngi ” u la ong .
Shuh shuh u la ong ruh ba ka jingkyntu ïa uwei pa uwei u dkhot jong ka HYC bad kumjuh ruh na ka bynta jaitbynriew kiba ieit ïa ka HYC sngewbha kiar ïa kum kine ki jinglong.
U Bah Roykupar u la ong ruh ba ka ilekshon kan wan bad kan leit, ki seng saiñ pyrthei ki nongïaleh ki wan ban kin leit hynrei kynmaw kaba burom bad ka akor jong ka jaitbynriew ka dei ban neh bad ban sah, kiar na ka jingbein, kiar na ka jingkynthoh ïa ki nongïalam jong ki balang bapher bapher, ïa ki nongïalam jong ki seng saiñ pyrthei bapher bapher, ïa ki longkmie ki jong ngi. Nga sngew ban khot bad wer lyngba kane ka por kaba mynta ïa ngi kum ka jaitbynrew ba ai ngin bat ïa ki mawbyrsiew ïa kaba la tip ïa ka jinglong kyrpang ka jong ngi, ai ba ngin burom ïa ki dkhot jong ka jaitbynriew, ïa ki nongïalam Balang, ki nongïalam niam ki jong ngi bad ai ba ngin kiar ïa ki jingkynthoh.
” Nyngkong eh ïa ki dkhot jong ka HYC uwei-pa-uwei kiba lah ban ïohi lyngba kane ka khubor ba ai ba ngi ngin nym long kiba kum kita ki briew, hooid uba leh un sa ïoh ïa la ka jong ka bainong, u ban bishar u dei u nongthaw u jong ngi lada phi kren ïa ki bym dei, hynrei kaba ngi ngi kwah ai ba kata ka jaitbynriew Hynñietrep kaba tipbriew kaba tipblei kaba tip kur kaba tip kha kan ïai neh bad ïai sah, ngim kwah ban ïohi ïa kum kine ki jingkynthoh, ba kum kine ki kyntien kin mih ha kane Bri ka jong ngi ” u la ong .
Shuh shuh u Bah Roykupar u la ong ruh ba ki briew kiba nabar kin rkhie kin sngewtynnad ba kum ka jaitbynrew kaba tang khatlai haduh khatsaw lak ngi ïa pyrshah ban ïa kynnoh ban ïa kynthoh hapdeng jong ngi .
“Ngi kwah ban ong ba hooid ka jingjied ïa kino-kino ki nongïalam, ka jingjied ïa kino-kino ki nongmihkhmat ka dei ka hok ka jong nga bad ka jong phi iwei la iwei, ka shong ha ngi ban rai ïano ngin jied hynrei wat ai pat ba kane ka por ban ïa jied ïa kita ki nongkitkam, ki nongthaw aiñ ki jong ngi kan dei ka por ba ngi ngin ïa kynnoh lane kynthoh para ma ngi, wat ailad ba ha kum kane ka por kiwei pat ki jaitbynriew kin rkhie beiñ kin rkhie tohhoh kin sngewkmen ba ka jaitbynriew Hynñietrep kam tylli ynda la poi ka por ilekshon” la ong u Bah Roykupar da kaba u la bynrap ruh da kaba ong ba “lada tang da ka ilekshon la lah ban pynïapait ïa ka jaitbynriew ka jong ngi, ka jingkylli ka long ba la wan kita ki aiñ ïakjakor bapher bapher kiba ki briew kiba don ha ka bor ki lah ban shna. Hato ym don se ka lad ïa kiba kum kita ki briew kumno ban pynpait ïa ka jaitbynriew?
U Bah Roykupar u la ong ruh ba ai ba kine ki jingjia kiba la jia kin long ki nuksa ïa ngi uwei pa uwei u dkhot jong ka jaitbynriew ka jong ngi.
Ha katei ka sngi nalor ka jingpynskhem ïa ki nongkitkam, ka HYC ka la ïoh ruh ban pynkup burom ïa ki nongkitkam barim ka HYC Nongstoiñ kumjuh ïa ki nongrwai kiba paw ka thaiñ Nongstoiñ ba kynthup ïa ka samla Mattibahun Shangdiar, u Bah Dono Jame Dkhar bad ka kynhun Thunder Cave.
Ha kane ka sngi nalor u Bah Roykupar Synrem kum President rangbah ka HYC Sengkmie, la donlang ruh u samla Gee Mawlong Vice President CEC, ki nongkitkam ka HYC West Khasi Hills, u Brother Malcomeson Mylliem , ki dkhot ka HYC ka Nongstoiñ , ki nongkitkam ka HYC Women Wing bad kiwei kiwei.
