Jerusalem, Iaïong:
Ka Israel ha ka Sngi U Blei ka la pyntip ba ki lehnoh Hamas ki set bad buhrieh ia kito kiba shah rahbor baroh hapoh ka nongbah Rafah kaba don sha ka phang Shathie jong ka Gaza, kaba long ruh ka thaiñ ba u Myntri Rangbahduh ka Israel- u Benjamin Netanyahu u thmu ban phah leit hiar thma jur namar ka jingmutlop jong katei ka kynhun lehnoh Hamas ka bym shym la treh ban pyllait ia kitei kiba ka la rahbor naduh ba sdang jong ka thma haduh kane ka kynti tang namar ba ka Israel kam shym mynjur ban pyllait lang noh ia kito ki nong Palestine kiba ka Israel ka la kem bad set naduh ki por ba la leit.
Kumjuh ruh na ka liang ka tnat shipai jong ka Israel, ka la ong ba ki lehnoh Hamas ki dang iai bat ia kitei ki paidbah nong Israel kiba la shah rahbor wat haduh kine ki sngi ruh bad ka Israel ka dang ialeh katba lah ban pyllait bad wanlam biang ia kitei ki paidbah jongka sha la iing.
Ha kawei pat ka jingkren, u heh ka tnat iada jong ka Israel u la iathuh ba ka Israel ka la dep pynkhreh lypa ia 2 tylli ki tnat kynhun shipai ‘Brigades’ na ka bynta ban leit hiar thma tyngeh sha Gaza. Hynrei um shym la pynshai pat ba ha kano ka bynta ia kitei ki kynhun shipai ka Israel kan leit pynrung.
Kumta, la ong ba kane ka khubor ka long tang hadien katto- katne sngi ba ka Israel ka la pynmih noh ia ki shipai lajong na Shathie jong ka Gaza napoh ka thaiñ Khan Yunis, ha kaba ki paidbah nong Gaza ki la leit ban rung bad shong biang ha kito ki shnong kiba la um bad julor ha ki bom bad ki ‘namding ka Israel da ka jingkyrmen ruh ba ka Israel kan sangeh noh syndon ia ka thma ha kane ka sien.
