Shillong, Ïaïong 15
U President ka National People’s Party (NPP) Meghalaya, Bah Prestone Tynsong uba dei ruh u Symbud Myntri Rangbah ka jylla, u la ong ba ka jingkwah Article 371 jong ka VPP ka la shai kdar ba ki kwah ban pynkylla ïa ka jait ka khong.
U Bah Prestone u la kren ïa kane ha ka jingïalang ïalap ilekshon kaba la long ha ka Lah Sngi U Blei ha shnong Umlyngka na ka bynta ban pan jingkyrshan ïa ka kyrtong MP ka NPP ka Kong Ampareen Lyngdoh.
Une u nongïalam ka NPP u la ong, ba ka NPP ka kwah ban ïoh ka jubab ba ka nongrim kaba kumno ba ka VPP ka kwah ban ai jait sha u kpa bad ha ki jingpynshai ba ki la ju ai, la sngew kumba ka dei, ha kaba u kpa u dei u Khasi, ka kmie ka dei Khasi.
“Ki ong ieid jaidbynriew. Nga buh ka jingkylli ba ïathuh ïa ka nga bad ïa ka NPP ba da ka Article ba kumno pat ba phin wanrah ban lait na ka shongsang. Sngewbha jubab ïa kane hapoh ka 4 baje janmiet jong ka 17 tarik, bad lada phim lah wat ïalam bakla pat ïa ki paidbah,” la ong u Bah Prestone bad bynrap ba ka jaidbynriew nalor ka dei kaba rit bad kumta lada jia sa ka shongsang te kaei ka ban jia.
U Bah Prestone u la ong ba ka mat pdeng jong ka jingïakren ïalap ilekshon ka long beit ka jaidbynriew hynrei haba la shong bad pyrkhat bad puson bha ka jingmut ka kyntien jaidbynriew, ka dei ban sdang bad ieid shwa na lade marwei, sa ieid sa ïa ka longïing-longsem, ban pynkhlaiñ ïa ka jait ka khong kumba leh u menbarim, hynrei mynta mut pynkylla khongpong. Hato ka dei ka ieid jaidbynriew?
Shuh shuh u Bah Prestone u la kyrpad ïa ki paidbah ba kin long kiba husiar na ki nongpynsngewthuh bakla kiba mih mynta ka kynti, namar shwa kane lane ha u 2023 kam shym la don ne mih kumne.
U la ong ruh ba ki paidbah ki dei ban bishar bha ïa ki nongïalam ka seng thymmai bad ïa ki mat ba wanrah naba ki wanrah tang shiteng lynti. Kylli kaei kaba mih na ka Reservation Policy, 9 ne 10 sngi shah thngan, hynrei ki ïoh pat ka tulop, katba ka jingshah ktah ka dei jong kito kiba leit phai ïing, wan biang ha ka step kaba bud.
U la pynshai kdar ruh sha ki paidbah ba kim dei ban shah pynsngewthuh bakla khamtam lei haba don ka jingïatreilang bad ka BJP, namar wat la ïatreilang hynrei ïa ki mat ka jaidbynriew, ka NPP lano-lano ruh kan nym shah ban ktah.
