Shillong, Ïaïong 15
U MDC ka Rambrai-Jyrngam, Bah Bajop Pyngrope, u la pynksan ïa ka jingkynnoh jong ka jingdon ka jyrsieh thied jaka jong ka Khasi Hills Autonomous District Council (KHADC) ha Mawkyrwat ha ka por ba long Chief Executive Member (CEM) u Bah Ardent M Basaïawmoit uba dei ruh mynta u President ka Voice of the People Party (VPP).
U Bah Bajop u la sei ïa kane lyngba ka dulir ‘Sale Deed’ kaba la Xerox ha ka jingïalang ïalap ilekshon jong ka NPP kaba la long ha ka janmiet Lah Sngi U Blei ha shnong Umlyngka na ka bynta ban pan jingkyrshan ïa ka kyrtong ka seng ka Kong Ampareen Lyngdoh.
U Bah Bajop u la ong ba ha kane ka dulir thied jaka, ka la don ka jingsoi kyrteng jong u MLA ka Nongkrem Bah Ardent M Basaïawmoit kum u nongsakhi na ka bynta ka Executive Committee jong ka Council.
“Nga la ïohi ba 2 kynta shwa ba ngin poi hangne, ka la don ka jingujor ejahar pyrshah ïa uwei na ki nongïalam NPP da u Bah Ardent,” la ong u Bah Bajop bad bynrap ba dei na kane ka daw, ba um banse ban sei ïa kine ki jingshisha.
U la ong, “Kane ka dei ka ‘Sale Deed’ jong ka kam ïadei-ïathied jaka ha Mawkyrwat. Ngam thok ïa phi bad phi lah ban pan da ka RTI na ka KHADC ban pynshisha.”
U Bah Bajop u la ong ba katkum ka dulir, ka KHADC ka la thied ïa ka jaka ha Mawkyrwat ha u snem 2014 ha ka dor ba T. 35,240,39.
Shuh shuh u la ong, “Kane ka dei ka ‘sale deed’ bad ngam ïalam bakla, ngam thok. Ka ‘sale deed’ ka la kren shai ba la dep siew lut ïa ka pisa, pynban ha u snem 2022 haba ka KHADC ka la leit ban shimti ïa ka jaka na u trai hynrei une u trai jaka u khlem shah satia ïa ka Council da kaba aidaw ba u khlem pat ïoh ïa ka pisa”.
Une u MDC ka Rambrai u la ong ba kane ka jingujor ejahar u Bah Ardent ka dei tang ban ïalam bakla ïa u paidbah bad bynrap ba kane ka jingujor ejahar mynta lei ka la nang pynsuk ïa ki pulit ban pynlong ïa ka jingtohkit ban tip kumno ki sei ïa ka pisa.
U la ong ruh ba ha u snem 2023, ka KHADC ka la leit ban jurip ha ka jingïadon lang u MDC ka Mawkyrwat hynrei u trai jaka u khlem wan mih shuh, ha kaba u la kynnoh ba la shem ba une u trai jaka u dei u paralok ba ïaieid ïajan bha bad u President ka VPP bad kynnoh ruh ba une u trai jaka u dei uba la mih ban ïakhun teng ïa ka ilekshon MDC na ka HSPDP na Mawkyrwat ha ka por ba u Bah Ardent u dang don bad ka HSPDP.
