Vatican City, Iaïong:
Hadien ba la sakhi ia ka jingiakynad jong ki ri bapher bapher khamtam haba iadei bad ka jingiakynad hapdeng ka Iran bad Israel ha kane kine ki sngi, u Pope Francis ha ka Sngi U Blei u la pynpaw ka jingsngewkhia kaba khraw halor kiei-kiei baroh kiba ka pyrthei baroh kawei ka sakhi ha kine ki sngi bad kumta ruh u la ong ba ka long kaba kongsan ban leh eiei na ka bynta ban iada bad ban tehlakam ia ki jing-iakynad khamtam ha Middle East kumba la iohi ia ka jinglong- jingman ha Middle East kaba la shu pyn-ap sa tang da ki thma kat sha ba phai.
Haba ai jingkren sha ki riewngeit ‘Pilgrims’ ha St. Peter’s Square ha katei ka sngi, u Francis u la kren shaphang ka jingleit thombor bad jingleit pynhiar kput jong ka Iran ia ka Israel da ki ‘drone’ bad ki ‘namding ha kane ka por bad kaba long ruh ka jingma kaba khraw namar ka lah ban wanrah ia ka thma bah lane ka thma kaba jur tam khamtam ba ha kine ki sngi kat sha ba phai la iohi ba ki dap tang da ki jingiakynad para marjan ri bad khlem pep lada ym lah ban tehlakam noh ha kane ka por, ka Thma-bah ba Lai kan sa wan jia shen.
Kumta ruh u Pope u la ong ba baroh ki ri ka pyrthei ki don la ki aiñ bad ki don la ka jong ka bor ban synshar hapoh ka jong ka ri. Hynrei u la ong pat ba kitei ki ri kim dei ban ia pyni bor ne ban kwah rhah ia u pud- u sam ne ka bynta jong kiwei pat ki ri bad kim dei ruh ban shu ia pyni bor tang namar ki daw barit-baria, pynban ki dei ban ialeh ban wanrah sha ka miej iakren ïasuk bad ban kiar na ki jingiakynad bad ki thma tang ban wanrah ia ka shongsuk-shongsaiñ ha ka pyrthei baroh kawei.
Ha kajuh ka por ruh, utei u nongialam niam u la kyntu ia ka Israel ba ka dei ban sangeh noh ia ka jing-leit hiar thma jong ka pyrshah ia ka Gaza namar ka jinglong- jingman ha katei ka nongbah ka la hiar shaba palat bad ki paidbah kim lah shuh ban im suk bad kim ioh shuh ia ka met kaba koit- ba khiah kumba ka dei ban long ia baroh lang.
Namarkata, ha katei ka sngi u Pope da ka jingbitar bad ka jingsngewkhia u la bthah ia baroh ki ri ba ki dei ban sangeh noh ia ka thma, sangeh noh ia ki kam thombor bad ki jingpyni bor, bad ki dei ban sangeh noh ia ki jingiakynad baroh. Ki dei ban wanrah pat ia ka lad ban poi sha ka jingiasuk- iasaiñ bad ban wanrah ia ka shongsuk-shongsaiñ ha ka pyrthei baroh kawei.
