Shillong, Ïaïong 15
Ka ‘thei ïakura ka Jylla, ka Mainu Ridonisha Syngkli ka la lah ban khur ïa ka takma ksiar ha ka rynsan ïakura jong ka Khelo India REC Combined National Talent Hunt Programme 2023-24 (Elite Women Boxing Championship ) kaba la long ha SAI NBA, Rohtak kaba ha Haryana.
Kane ka ‘thei ïakura kaba la don ar ngut ki khun na ka shnong Nongkhrah kaba na Ri Bhoi District, ka la lah ban pynliem noh ïa ka ‘thei ïakura na Haryana ka Neha da 5-0 ha ka jingïakhun final jong ka 75-81kg ha ka sngi U Blei.
Haba ïakren bad U Nongsaiñ Hima, ka Mainu ka la pynpaw ïa ka jingsngew-kmen ba la wanphai biang sha ka kam ïakura bad ban ïoh ruh ïa ka lad ban mihkhmat biang ïa ka Jylla ha katei ka rynsan ïakura. “Ha kaba nyngkong nga la pynrung kyrteng ïalade lyngba ka online bad nga la ïoh ban ïashim bynta shwa ha ka Eastern Zone kaba la long ha Guwahati ha u Lber mynta u snem bad ha kaba nga la lah ban khur ïa ka takma ksiar.”
“Dei lyngba kane ka takma ksiar kaba la plie lad ïa nga ban shah jied ban na ka bynta ban mihkhmat ha ka REC Combined National Talent Hunt Programme ha kaba ki don bun ki nongïakura kiba la khur jingjop ha la ki jong ki zone,” ka la bynrap.
Hashwa ba kan khur ïa ka takma ksiar, ka Mainu ka la lah ban pynliem noh ïa ka Anjuman Sharma kaba na Delhi ha ka quarter final bad ha ka semi final ka la lah ban pynliem ïa ka ‘thei ïakura kaba na Haryana, ka Ritu.
Wat la ka la trei mynta ha ka CISF (Central Industrial Security Force) kaba ha Guwahati, pynban ka Mainu ka dang ïai thrang ban ïoh ïa ka lad ban mihkhmat ïa ka Jylla ha kiwei ki lympung ïakura (national level).
Lah ban pynkynmaw ka Mainu ka la khur ïa ka takma ksiar ha ka North East Games 2010 kaba la long ha Shillong bad hadien san snem ka la khur ïa ka takma rnong ha ka North East Games 2015 kaba la long ha Manipur.
