Shillong, Ïaïong 15
Ka Bharatiya Janata Party (BJP) ha Meghalaya ka la pynlong jingïalang ïalap ilekshon kylleng-kylleng ki jaka kiba hap hapoh ka Shillong Parliamentary konstitwensi na ka bynta ban ai jingkyrshan ïa ka Kong Ampareen Lyngdoh kaba dei ka kyrtong jong ka National People’s Party (NPP).
Ha u kyrwoh khubor, ka BJP Meghalaya ka la ong ba ka BJP ka la pynshat pynthaba ïa ka jingïalap ilekshon ban kyrshan ïa ka Kong Ampareen.
Ka BJP ka la ong ba naduh ka jingïakynduh lang kaba la long ha u Lber hapdeng ki arliang ki paralok NDA ha ka jylla, ki nongtrei ne ki dkhot jong ka BJP na baroh ki district jong ka Shillong konstitwensi ki la trei minot bad shitrhem ban pynïoh jingjop bad ban poi sha ka thong ïa ka paralok jong ka BJP ka NPP na Shillong Lok Sabha konstitwensi.
La ong ba haduh shiphew hajar ngut ki dkhot ne nongtrei ba shitrhem kiba la trei minot tyngeh ban pyntikna ba ka jylla jong ngi kan ïoh bhah lang ha ka jingïoh nongmihkhmat ha ka Sorkar NDA kaba la ïalam da u Narendra Modi, ka sorkar kaba lah ban wanphai biang ha ka sien kaba lai, ba la ïathuh lypa da ki nongpeitngor ha kine ki khyndiat bnai ba la dep.
Ka BJP ka la ong ba katba ka jingïalap ilekshon ka la nang jam sha ka sngi ban jied ïa ki nongmihkhmat ka la jan, ka jingshitrhem bad jingthrang ban pynlong kum kine ki jingïalang ka la nang rhem nang rhem.
La ong ba u MLA ka BJP u Bah Sanbor Shullai u la pynlong bun tylli ki jingïalang ha Kench’s Trace, Laban bad Cantonment Area, da kaba kyntu ïa ki nongbud ban thep bad shon ha ka shap jong ka kot mynta kynti namar ka BJP kam pynïeng kyrtong.
Ha kine ki sngi, ka Kong Priyambada Blah kaba dei ka President jong ka BJP ST Morcha bad Kong Eunesscy Khyriem kaba long ka General Secretary ki la leit ïalap ilekshon na bynta ka Kong Ampareen Lyngdoh ha Nongrang bad Thangmaw ha Mihngi jong ka West Khasi Hills ha kaba la donlang ruh ki nongïalam na ki distrik kum ka Kong Wanpynbiang Nongtariang, Bah Pranes Nongrang bad Kong Sunita Swer bad kiwei kiwei.
La pynlong ruh ki jingïalang ha ki san tylli ki Mandal kiba hap hapoh ka jingpeit jong u Hehduh ka Ri- Bhoi distrik, Bah Sen Thabah bad la ïohi ruh ïa ka jingbun jong ki nongwan sngap, ha Rilum Jaiñtia ruh ba la pynlong da u distrik President Bah Commanderful Sana bad ki nongtrei ba shitrhem kiba trei mon sngewbha kiba trei met bad mynsiem. U Bah David Kharsati uba long u dkhot ka BJP National Council bad Secretary General Bah Wankitbok Pohshna ki la donlang ban pynshngaiñ bad ai mynsiem ha kane ka jingïalang.
Ka OBC Morcha ruh ka la donbynta lang ha kaba ka la pynlong jingïalang ha Nongpoh, ba la ïalam da u Maneshwar Singh, ha kaba la donlang ka Kong Dell General Secretary ka East Khasi Hills bad President ka OBC u Arun Kumar. U President ka BJP Kisan Morcha Bah Ralden V Shabong u la donlang ban ai ka jingkyrshan ïa ka kyrtong jong ka NDA.
Kum ban pyni ne pynkynmaw ïa ka jingtrei jong ka BJP Mahila Morcha ba la ïalam da ka Kong Susuki Pariat bad ka BJYM Youth Wing ba la ïalam da Mewanker Lyngdoh kiba la trei shitrhem khlem shongthait kiba la pynlong ki jingïalang bad ïakynduhlang kiba shongkun ki ban ïalam sha ka jingjop.
Ka BJP Mahila Morcha bad ka kynhun ki la trei shitom ha kaba ki la leit ïalap ilekshon ha man la ki thliew ïing na ka bynta ka kyrtong ka NDA ka Kong Ampareen Lyngdoh ha Shillong bad ha kiwei kiwei ki jaka.
Ka BJP ka la ong ba haba peit ïa ka jingtrei minot jong ki kynhun kum ki dkhot, ki nongïalam, ki nongtrei mon sngewbha jong ka BJP ha Meghalaya, ki kynhun jong ka seng nangne na jylla ki la sngew tikna ban rah jingjop mynta ka kynti. “Iss baar 400 paar, mynta ka kynti ka BJP kan tam ïa ka 400 ngut ki dkhot (MP) ha Ïingdorbar Thawaiñ,” la ong ka BJP.
