Shillong, Ïaïong 15
Ki khun ki hajar kiba don hapoh ka jingpeit jingkhmih jong ka Seng Khasi Sengkmie, ha ka 15 tarik Ïaïong ki la ïoh ban pynkut ïa ka leh niam leh rukom jong ka Shad Suk Mynsiem lyngba ka jingwan ïashimbynta jong 1600 tam ngut ki nongshad kiba kynthup ïa shynrang bad kynthei ha ka jingïalumlang kaba la pynlong ha Madan Weiking, Jaïaw.
Haba ïakren bad ki lad pathai khubor, na ka liang u Vice-President ka Seng Khasi Sengkmie, u Rangbah RS Rumnong u la ong ba ka Shad Suk Mynsiem mynta u snem 2024, ka dei ka jingshad kaba 113 sien kaba la shad hapoh katei ka lympung Weiking.
“Ïa kane ka jingshad ngi pynlong manla u snem, ha une u snem 2024 ruh ngi la pynlong ha ka 13, 14 bad ka 15 tarik kaba long lai sngi hangne hapoh lympung Weiking”, la ong u Bah Rumnong.
Nalor nangta u Bah Rumnong u la ong ba wat la ki bor jong ka mariang ki la pynthut ïa ka jinglehkmen bad ka jingshad hynrei kiei-kiei ki long kiba ïaid beit ïaid ryntih bad ki nongshad ki la pyndep ïa ka jingshad ainguh ïa u Blei Trai Kynrad ïa ki jingkyrkhu ba u la theh-sei ïa u khun bynriew ha u snem ba la dep bad ha kajuh ka por ban ainguh ïa u bad ban kyrpad ha u ba un ai ïa ka snem ka ban wan ruh ba kan long kaba phuh-phieng bad kaba ïaid beit ïaid ryntih ha manla ki liang.
“Ka bor jong ka mariang bad ka bor jong ka suiñbneng ka dei hi ruh ka por jong ka te ngim lah ban len, ka don hi ka jingpynthut khyndiat hynrei wat la katta ruh, ki nongshad kim kynran dien ban pyndep hi la ka deiti bad la ka kamram ban shimti bad ban wan ban shad ainguh ïa u Blei Trai Kynrad Nongthaw-Nongbuh ïa ki jingtheh-sei jong u bad ka ksing, ka dhah, ka tangmuri ruh ka da kynud bha ha kine ki sngi wat haba pynthut u slap, ka lyer bad u phria ruh”, la ong u Bah Rumnong.
