Shillong, Ïaïong 15
U Bah Brighstarwell Marbaniang uba dei u nongmihkhmat ka Voice of the People Party (VPP) napoh ka Mawlai konstitwensi, u la ong ba ki seng saiñ pyrthei bapher-bapher ki la pyrshang ban pynthame ïa ki paidbah ka jylla da kumne-kumtei hynrei u ngeit skhem ba kum ki paidbah ka jylla kin nym ngop lane shah pynbiej khamtam ha ka ban pdiang ïa ka National People’s Party (NPP) bad ka Bharatiya Janata Party (BJP) hapoh ka jylla.
Haba ai jingkren ha ka jingïalang ïalap ilekshon jong ka VPP kaba la pynlong ha ka janmiet Lah Sngi U Blei ha Mawlai Petrol Pump, u Bah Brightstarwell u la ong ba ka jingsdang ban pynjah kyrteng noh ïa ka seng NPP kan sdang napoh ka shnong Mawlai. Kumta u ngeit skhem ba napoh ka shnong Mawlai kan pur sha kiwei pat ki konstitwensi ha kaba kum ka Jaitbynriew ha kane ka kynti kaba mynta kan phaikhmat noh sa tang sha ka VPP.
“Na ka shnong Mawlai, ngin sdang ban pynjah kyrteng noh ïa ka NPP bad nga ngeit skhem nangne na Mawlai kan sdang bad kan pur sha kiwei pat ki konstitwensi bad ka Jaitbynriew kan ïohi ba ha kane ka kynti kaba mynta ba kum ka Jaitbynriew ka la phaikhmat beit tang sha ka Voice of the People Party”, la ong u Bah Brightstarwell.
U Bah Brightstarwell u la ong ba na ka liang jong ka seng ka la ong ba ha ka jingdon ryngkat lang jong ki paidbah ym don kano-kano ka bym lah ban leh. Lada u paidbah u ai ka jingkyrshan ïa ka VPP, kan nym don kano-kano ruh ka ban long kum u mawjynthut ïa ka seng ba kan ïeng na ka bynta ka Jaitbynriew.
“Ngi donkam tang ïa phi paidbah, ngim don ka spah ne ka phew haba ngi wan hakhmat jong phi paidbah, ngi long kiba thylli”, la ong u Bah Brightstarwell.
Shuh shuh u Bah Brightstarwell u la ong ba ki don kiwei-kiwei ki seng saiñ pyrthei kiba kjit ïa ka spah ka phew jong ka Jaitbynriew bad kiba la pynriewspah ïalade bad ïa ka seng jong ki hynrei ki la peit poh pat ïa ka seng VPP ha kaba ki la ong ruh ba ka jingmut jong ka VPP ka mut “Very Poor Party”.
“Ngi pdiang namar ba ka dei ka jingshisha, ka Voice of the People Party ka dei ka seng kaba duk bad kum ka seng, ngi kmen ba kane ka seng kan duk sah ruh hynrei ka thong jong ka Voice of the People Party ka long ban pynriewspah ïa ka Ri bad ka Jaitbynriew bad ban pynriewspah ïa uwei-pa-uwei u nongshong shnong jong kane ka jylla”, la ong u Bah Brightstarwell.
