Ha ka Sngi Thohdieng, 19 tarik Ïaïong, 2024, ki paidbah ka jylla kin jied ïa ki arngut ki MP, kata, na Shillong bad Tura Parliamentary Constituency, sha ka Dorbar Lok Sabha. Ynda la kut ka jingïalap ilekshon ha ka por 4 baje janmiet jong ka 17 tarik Ïaïong, 2024, ka la dei sa ka pali jong ki paidbah ba kin ïa puson ïano ba ki sngewdei ban phah sha Lok Sabha kum ki MP ki jong ki. Ka dei ruh ka jingtynjuh ïa ki paidbah namar ki lah ban don ki ban wan tyrwa pisa ban ïoh ïa ka ‘vote’ ka jong ki. Ha kajuh ka por, ki lah ban don ruh ki briew ki ban wan sha ki ïing ki sem ha ryngkat ka byrngem byrsit ba lada kim ai jingkyrshan ha ka sngi thep ‘vote’, ki lah ban ngat ha ka jingeh. Hynrei ngi kyntu ïa ki paidbah ba lada kum kita ki nongbyrngem ki wan kin pyntip mar-mar sha ki bahaïing hasem bad ki paralok bad ban ïasyllok kaei ka sienjam kaba dei ban shim la kin leit ujor da ka ejahar ha ki thanat pulit lane ban phah jingthoh sha ki District Election Officer (DEO) kiba dei ruh ki Deputy Commissioner lane sha ki nongïalam jong ki seng saiñpyrthei ba ki kyrshan bad kumta ter-ter. Tangba wat ym tieng, wat ym riej namar phi don ïa ka hok ban jied bad kane ka dei kaba la pynkhamti da ka Riti Synshar. Yn ym don kiba lah ban knieh ïa kane ka hok na phi. Kiba knieh lane kiba byrngem lane kiba tyrwa pisa, ki dei ban ngat ha ka jingshah pynsaja katkum ka aiñ.
Ha ka bynta banyngkong jong ka ilekshon, kata, ha ka 19 tarik Ïaïong, ka jingthep ‘vote’ kan long ha ki 102 tylli ki Lok Sabha konstitwensi, ha ka bynta kaba ar, ka jingthep ‘vote’ kan long ha ka 26 tarik Ïaïong ha ki 89 tylli ki konstitwensi, ha ka bynta kaba lai, ka jingthep ‘vote’ kan long ha ka 7 tarik Jymmang ha ki 94 tylli ki konstitwensi, ha ka bynta kaba saw, ka jingthep ‘vote’ kan long ha ka 13 tarik Jymmang ha ki 96 tylli ki konstitwensi. Ha ka bynta kaba san, ka jingthep ‘vote’ kan long ha ka 20 tarik Jymmang ha ki 49 tylli ki konstitwensi, ha ka bynta ba hynriew, ka jingthep ‘vote’ kan long ha ka 25 tarik Jymmang ha ki 57 tylli ki konstitwensi bad ha ka bynta ba hynñiew, ka jingthep ‘vote’ kan long ha ka 1 tarik Jylliew ha ki 57 tylli ki konstitwensi.
Ha Meghalaya, ka jingdon ki nongthep ‘vote’ ka la kiew da 55,971 ngut ha ka shi snem, kata, hapdeng u snem 2023 bad u snem 2024. Ka jingdon ki nongthep ‘vote’ baroh, kata, shynrang, kynthei bad ki ‘Third Gender’ ka long 22,17,100 ngut. Na kine, 10,94,947 ngut ki dei ki shynrang, 11,22,150 ngut ki dei ki kynthei bad 3 ngut ki dei ki ‘Third Gender’. Namarkata, ka jingdon ki kynthei kum ki nongthep ‘vote’ ka tam da 27,203 ïa ki shynrang. Na kitei ki 22,17,100 ngut, ha ka Shillong Parliamentary Constituency kaba kynthup ïa ki 36 tylli ki konstitwensi MLA, ki don 13,96,054 ngut ki nongthep ‘vote’.
Ki nongthep ‘vote’ ha Tura Parliamentary Constituency kaba kynthup ïa ki 24 tylli ki konstitwensi MLA ki don 8,21,046 ngut ki nongthep ‘vote’. Kane ka long katkum ka thup kyrteng jong ki nongthep ‘vote’ kaba la pynmih ha ka 5 tarik Kyllalyngkot, 2024. Ha Shillong, ki shynrang ki don 6,81,769 ngut bad ki kynthei ki don 7,14,283 ngut. Ha Tura pat, ki shynrang ki don 4,13,178 ngut katba ki kynthei ki kham duna ban ïa ki shynrang bad ki don 4,07,867.
Lah ban pynkynmaw ba ha ka ilekshon ha u snem 2019, na ka Shillong Parliamentary Constituency, u Bah Vincent H Pala na ka Congress, u la long u lahduh ha kaba u la tam da haduh 1,52,443 ‘vote’ ïa u kyrtong uba wan ba ar na ka seng United Democratic Party (UDP), u Bah Jemino Mawthoh, katba na Tura, ka Agatha K Sangma na ka NPP ka la jop bad ka la tam da 64,030 ‘vote’ ïa u kyrtong ka seng Congress uba la wan ba ar, u Dr Mukul M Sangma. Ha kato ka ilekshon, u kyrtong ka BJP na Shillong, u Bah Sanbor Shullai, u la ïoh kumba 75,790 ‘vote’ katba u Rikman G Momin na Tura, u la ïoh tang 31,384 ‘vote’. Kane ka pyni ba ka BJP kam pat lah ban ïoh jingshaniah na ki paidbah ha kane ka jylla wat la ka la jop kput ha ka ilekshon MP ha u snem 2014 bad 2019 ha kiwei pat ki bynta jong ka Ri.
Ki kyrtong kiba la tyrwa ïalade ban long ki MP Lok Sabha na Shillong Parliamentary Constituency ki kynthup ïa u MP ba mynta, u Bah Vincent H Pala na ka seng Congress, ka Kong M Ampareen Lyngdoh na ka National People’s Party (NPP), u Dr Ricky Andrew J Syngkon na ka Voice of the People Party (VPP), u Bah Robertjune Kharjahrin na ka United Democratic Party (UDP) da ka jingkyrshan lang ka Hill State People’s Democratic Party (HSPDP), bad ki arngut ki kyrtong khlem seng lane ‘Independent’, u Dr Lakhon Kma bad u Bah Peter Shallam. Na Tura Parliamentary Constituency, ki nongïakhun ki kynthup ïa ka MP ba mynta, ka Agatha Kongkal Sangma na ka NPP, u Saleng A Sangma na ka Congress, u Zenith M Sangma na ka All India Trinamool Congress (AITC), bad u Labenn Ch. Marak kum u kyrtong khlem seng (Independent).
Ngi kyntu biang sa shisien ïa ki nongshong shnong ba kin ïa mih paidbah ha ka 19 tarik Ïaïong, 2024 bad ba kin jied ïa kita ki MP katkum ka jingsngewbit ka jong ki. Hynrei wat ailad ba ki bor jong ka jingdum kum ki nongwan ai pisa, nongwan byrngem ba kin knieh noh ïa ka hok ka jong phi. Lada phi ailad ïa kiba kum kine, phin sa long mraw baroh san snem. Ha kajuh ka por, wat ym pynsep ei ïa ka por, ka bor bad ka iktiar kaba phi ïoh tang shisien ha ka san snem ban jied ïa ki MP ki jong phi. Wat pynlehnohei ïa ka shi ‘vote’ ka jong phi ïoh ba phi shu kut ha ka jingbabe ha baroh san snem lynter.
