Amlarem, Ïaïong:
Ka District Legal Services Authority (DLSA), West Jaiñtia Hills District hapoh ka NALSA ka la pynlong ïa ka jingïalap halor ka phang “Opening Doors for Education to Children/Campaign for school Dropout” na ka NALSA (Child Friendly Legal Services to Children and their Protection) Scheme, 2015 bad halor ka hok ki khynnah na bynta ka ‘Free and Compulsory Education, Act’ 2009, ha ka 12 tarik Ïaïong ha Amlarem Junction, West Jaiñtia Hills District.
Ïa kane ka prokram la pynïaid da ka Kong S.L. Phyllei, Chief Legal Aid Defense Counsel, West Jaiñtia Hills District kaba la ïathuh ba ïa kane ka prokram la pynlong khnang ban pynsngewthuh ïa ki nongshong shnong khamtam ïa ki khynnah skul kiba la pep skul shiteng por bad ruh ban pynsngewthuh shaphang ki skhim, ki jingïarap bapher-bapher ba ki khynnah pule ki lah ban ïoh.
La ïoh ïa ka jingkren na u L.S. Khonglah, Advocate halor ka phang ‘Rights of Children to Free and Compulsory Education Act, 2009’. Ha kaba u la pynshai ba kane ka aiñ ka batai shai ïa ka jingdonkam jong ka ‘free and compulsory education’, ka jingnang jingstad ka ba long laitluid bad kajuh na ka bynta ki khynnah kiba don hapdeng ka rta kaba 6 snem haduh 14 snem.
U la ong ba ka jingthmu jong kane ka aiñ ka long ban pynïoh ïa ka jingnang jingstad kaba paka na ka bynta ki khynnah hapoh ka Ri India khlem da peit ïa ka jingdon jingem, kyrdan bad kiwei-iwei. Ka jingstad ka long laitluid ïa baroh.
Halor ka phang “Poshan Scheme, SSA Scheme etc” la batai da u Bah H.C. Lamin, i/c SDSEO, Amlarem u la ong ba ka Sorkar ka ai mynta ha baroh ki skul sorkar ban pyntikna ba ki khynnah skul ki ïoh ïa ki jingbam kiba tei.
