Shillong, Ïaïong 15
Ka kynhun ïalehkai na Ri Bhoi District ka la khur ïa ka nam lahduh ha ka lympung ïalehkai 4th State Level Muay Thai Cham-pionship & Pro Fight 2024 ba la pynlong da ka Muay Thai Association of Meghalaya.
Ïa ka kyrdan ba-ar ha kane ka lympung kaba la kut ha ka sngi Saitjaiñ la ïoh da ka East Khasi Hills bad ïa ka kyrdan balai la khur da ka Eastern West Khasi Hill District.
Ha kane ka lympung kaba la pynlong ha Indoor Hall jong ka SAI Training Centre kaba la sdang naduh ka 12 tarik mynta u bnai, la wan ïashim bynta kumba 220 ngut ki khynnah kiba la wan na kylleng ki district na ka bynta ban shim bynta ha ka kyrdan Sub-Junior, Junior, Under-23 bad ha ka Elite.
Ka jingthmu jong kane ka lympung ka long ban jied ïa ki nongïalehkai kiba kynsai ki ban mih-khmat ïa ka Jylla sha ka National Championship and Pro Fight ban pynlong da ka United Muay Thai Association of India ka ban sdang naduh 25 haduh 30 tarik u Jym-mang ha Lakshimibai National Institute of Physical Education kaba ha Sonapur, Assam.
Ha katei ka sngi pynhap pyrda, la ïadon lang u Prabha Shankar Shukla uba long u Vice Chancellor jong ka NEHU kum u kongsan bad ka Dr. Streamlet Dkhar kum ka symbud kongsan ha ka jingïadonlang ruh ki nongshah khot sngewbha kata ka Dr. Khain, u Vijay Kumar, SI jong 67 Battalion CRPF Shillong, u Vice Precident ka Muay Thai Association u Bah Semple Pala, u Publicity Secretary, Bah John Kharkongor, Bah Donic Suchiang, Bah David Laloo, Bah Banker Kurkalang bad kiwei kiwei kiba la sam ïa ki khusnam sha baroh ki nongjop.
Ha katei ka sngi la ïoh ruh ka jingkren na u President ka Muay Thai Association u Bah A. Sun ha kaba u la pynpaw ïa ki jingeh ba ka seng ka ïakynduh man la snem ban pynïaid ïa kum kine ki lympung ïalehkai, namar ka jingbym don ïa ki tiar la jong, kum ka ring, ka hall bad ki tiar ki tar. “Man ba pynlong ïa kum kine ki lympung ngi hap ban siew sha ka SAI ha ka dor T.23,000 na ka bynta ar sngi bad ngi siew T.20,000 na bynta ka security bad lada don ka jingduh ha ki tiar ngi hap ban siew na katei ka security.”
Na ka liang u President u la kyrpad ïa ka Sorkar, kumjuh ïa u Myntri ka tnat ïalehkai bad ka Directorate of Sport and Youth Affair ba kin ïarap ban pynïoh ïa ka ring, ka training hall bad ki tiar ïalehkai. U la ai khublei ruh ïa ka Sorkar Jylla ha ka jingïalam u Conrad K Sangma kum u Myntri Rangbah, bad ruh ïa u Myntr ka tnat ïalehkai u Bah Shakliar Warjri, ka Director Kong Isawanda Laloo bad kumjuh ruh ïa ka MSOA kiba la trei shitom ban pynïoh ïa ka khusnam pisa bad ka baibam na ka bynta ki khynnah ïalehkai kiba khur jop ha ki lympung ïalehkai kiba la long hapoh ka ri bad wat shabar ri ruh kumjuh.
Ha kane ka kynti kaba mynta ka Synjuk ka lah ban pynlong ïa ka Pro Fight na ka bynta ki sub-junior bad ka jingïakob Waikru Competition bad ka Maymai.
Ka Synjuk ka la ai khublei kitbok kitriang ïa ki nongjop bad ka ai mynsiem ïa ki ba kin nangtrei shitom shuh shuh ha ki lympung ïalehkai bapher bapher bad kumjuh ruh ka Synjuk ka pynshlur bad ai mynsiem ïa kito kiba khlem jop ba kim dei ban duh jingkyrmen, hynrei ki dei ban trei shitom ban khur jingjop ha kiwei pat ki lympung ki ban wan.
