Shillong, Ïaïong 15
Ha ka janmiet Lah Sngi U Blei, ha ka por kumba 6 baje eiei, kawei ka trok kaba don ïa u nombor AR-02-A-6142 ka la rat naphang ïa ki kali rit kiba ïaid ha surok.
Ha katei ka jingjia kaba la jia ha Riatlawsyiem, Mawtawar, kawei ka kali ‘Auto’ trok kaba don ïa u nombor ML-05-AB-3716 ka la julor katba kawei pat ka ‘Alto’ K-10 kaba don ïa u nombor ML-05-AA-5519 ka la shah rat ha katei ka trok bad noh sha riat, hynrei da ka jingdon jong uwei u dieng kseh ka la sahkut noh halor.
Haba ïakren bad uwei na ki bahaïing jong uba ñiah ïa ka kali ‘Alto’, u la ïathuh ba u la poi mar-mar sha katei ka jaka hadien ba u la ïoh jingtip halor kaei kaba la jingjia.
U la ïathuh ruh ba ki briew kiba shong ha katei ka kali kiba la mynsaw la pynkit noh sha aspatal ban ïoh jingsumar.
Na ka liang ki pulit ka thanat Mawlai ki dang pynlong ïa ka jingtohkit ban lap ïa ka daw jong katei ka jingjia.
