Shillong, Ïaïong 15 (UNI)
Ka jingïalap ilekshon da ki seng saiñ pyrthei bapher-bapher ka la nang shongshit katba ka Jylla ka nang jan sha ki sngi jong ka kylla banyngkong ka ilekshon ban wan sha ka Lok Sabha ha ka 19 tarik mynta u bnai ban jied ïa ki dkhot ki ban leit mihkhmat sha Parliament na Shillong bad Tura Parliamentary konstitwensi.
Ki kyrtong jong ki seng saiñ pyrthei ki la pynlong ïa ki jingïalap ilekshon ha nongbah Shillong bad kiwei-kiwei ki jaka ban kyrpad ïa ka jingkyrshan ki paidbah.
U Myntri Rangbah ka Jylla, u Conrad K. Sangma, uba dei ruh u President ka National People’s Party (NPP) u la bunkam ha ka jingïalap ilekshon ha kylleng ka Jylla ban pan jingkyrshan na bynta ka MP ka Tura, kaba dei ruh ka para jong u, ka Agatha K. Sangma bad ka Myntri Sorkar Jylla, Dr. M. Ampareen Lyngdoh ka ban aireng na Shillong Parliamen-tary konstitwensi.
U MP ka Shillong, Bah Vincent H. Pala jong ka Congress u la pyntyllun ïa ki prokram ïalap ilekshon jong u ban pynneh khnang ban poi biang sha ka thong ha ka sien kaba saw.
Ha kawei ka liang, naduh jong ka jingïalang mynshem bnai hapdeng ki 2 tylli ki seng kiba ïatehlok hapoh ka NDA ha ka Jylla, ki nongkitkam ka Bharatiya Janata Party (BJP) na baroh ki distrik jong ka Shillong bad Tura ki la tur sha madan ban pyntikna ïa ka jingjop jong ka seng kaba ïateh lok bad ki – ka National People’s Party (NPP) na Shillong bad Tura.
Ka kyrwoh na ka BJP ha ka Lah Sngi U Blei ka ong ba kumba shiphew hajar ngut ki nongtrei ki la trei minot tyngeh ban pyntikna ba ka Jylla kan ïoh ïa ka bhah nongmihkhmat ha ka Sorkar NDA ba ïalam da u Narendra Modi, “kaba pynkhreh ban wanphai biang ha ka sien kaba lai kaba la ïathuh lypa da ki nongpeitngor ha kine ki khyndiat bnai ba la dep.”
Katba ka tarik ban pynkut ïa ka jingïalap ilekshon ka nang jan, ka jingïoh mynsiem bad jingkwah ban pynlong ïa ki jingïalang ka la nang rhem.
U nongmihkhmat ka BJP, Bah Sanbor Shullai u la pynlong ïa bun tylli ki jingïalang ha Kench’s Trace, Laban bad Cantonment Area, da kaba kyrpad ïa ki nong ‘vote’ ban ñion ha ka shap jong ka kot mynta ka kynti kum ka jingkyrshan ïa u Modi.
Hashuwa, ka Meghalaya BJP State Morcha ka la pynlong ïa ka jingïalap ilekshon na bynta ka Dr. M. Ampareen Lyngdoh ha Nongrang bad Thadmaw ha Eastern West Khasi Hills.
Ha kajuh ka por, la pynlong ruh ïa ki jingïalang ha 5 tylli ki Mandal hapoh Ri-Bhoi distrik kum shi bynta ban pan jingkyrshan ïa ka kyrtong ka NPP bad la sakhi ruh ïa kiba kum kine kijuh ki jingïalang ha East Jaiñtia Hills distrik.
Ka OBC Morcha jong ka BJP ka la pynlong ruh ïa ka jingïalang bad ka State BJP Mahila Morcha lem bad BJYM ha Nongpoh, Ri-Bhoi distrik.
