Shillong, Ïaïong 15
U President ka Voice of the People Party (VPP), Bah Ardent Miller Basaïawmoit, u la ong ba kaba sngewkmen hapdeng ka jingïalang ba la pynlong da ka VPP ka long ba kane ka seng kam ju wanrah ïa ki briew kiba nabar ha kano-kano ka shnong kaba ki ju leit ban ïalap ilekshon.
Haba ai jingkren ha ka jingïalang ïalap ilekshon kaba la pynlong da ka seng ha ka janmiet Lah Sngi U Blei ha Mawlai Petrol Pump, u Bah Ardent u la ong ba u sngewsynei ïa u Symbud Myntri Rangbah ka jylla, u Bah Prestone Tynsong namar ba u la shah shet kylla ha la ki jong ki nongbud ha kaba kitei ki nongbud ki la ong ba u dei ban wan ai jingkren hapoh Mawlai Stand Bus bad ha katei ka jingïalap ilekshon un sa mih u paidbah ka Mawlai, hynrei phewse ki paidbah kiba la wan hapoh ka jingïalang ba la pynlong da ka National People’s Party (NPP) ha ki sngi kiba la dep kim dei satia ki nong Mawlai wat haba u Bah Prestone u la kren shongshit bha ha katei ka jingïalang.
“U Maduh u la kren shitrhem bad u la sngew ïohbor ba u la ïohi ïa u paidbah uba bun, hynrei phewse u la shah shukor ha la ki jong ki nongkyrshan, kata ka dei ka saiñ pyrthei jong ki keiñ ban ïa thok ïa shukor, ban ïalam bakla, ban pynbiej bad ban pynthame”, la ong u Bah Ardent.
Shuh shuh u Bah Ardent u la ther tyngeh ruh halor ka ka jingkynthoh jong u Chief Executive Member (CEM) ka KHADC, u Bah Pynïaid Sing Syiem ha kaba u la ong ba naduh ba la mih ka seng thymmai ka VPP hapoh ka jylla, ka la mih ka jingleh shongshit bad ka la don ruh ka jingpynkheiñ ïa ka aiñ ha kane ka ilekshon MP. Na ka liang u Bah Ardent u la ong ba ki nongkyrshan jong ka VPP ki khlem pynmih ïa kano-kano ka jingkulmar ban pynduh noh ïa ka shongsuk-shongshngaiñ hynrei ka la pynkulmar ïa ka jingmut jingpyrkhat jong ki seng saiñ pyrthei kiba la synshar ïa ka ri hapoh kane ka jylla.
“Ka la pynkulmar ïa ki namar ki tip ba lada u paidbah u kyrshan ïa ka VPP ha kane ka ilekshon kaba mynta bad lada u paidbah u pynjop ïa u Dr Ricky, khlem pep ha kawei ka sngi, ka VPP kan sa kurup ïa ka bor synshar ha kane ka jylla bad ynda ka VPP ka la kurup ïa u lakam jong ka synshar ka khadar, ngi la ong ba ngin peh ïa ka bamsap, ka jingduk, ka jingleh shiliang khmat”, la ong u Bah Ardent.
U Bah Ardent u la ong ba u Symbud Myntri Rangbah ka jylla u la duh thiah bad duh dem bad u la ïarap ban pynïarap ïalap ilekshon lem ruh ïa ka VPP namar tang shisien kren u la pynmih ïa ka kyntien ‘Prah’.
