Shillong, Ïaïong 15
U kyrtong jong ka Regional Democratic Alliance (RDA), Bah Robertjune Kharjahrin u ban ïakhun ïa ka ilekshon MP sha Lok Sabha ka ban long ha ka 19 tarik mynta u bnai, u la kyrpad ïa ki paidbah ba kin jied ïa u nongmihkhmat da ka jingkitkhlieh bad ka jingïohi jngai na ka bynta ka lawei jong ka ri bad ka jaidbynriew.
U Bah Robertjune u la kren ïa kane ha ka jingïa-lang paidbah ha Pynursla kaba la long ha ka Lah Sngi U Blei na ka bynta ban pan jingkyrshan na ki nongshong shnong ha kane ka ilekshon.
U Bah Robertjune u la ong ba ki paidbah ki dei ban tip ïa ka bor jong ka Parliament kaba kum ka Jylla ka ïatyngkhuh bun, kata kaba don ïa ka bor ban pynurlong ïa ka jingdawa ILP, ban pyntreikam ïa ka ktien Khasi, ban pynbeit ïa u pud u sam, ban wanrah ki kam pynroi kiba bun bad bun bah kiwei kiwei ki bor.
“Kumta kum ki paidbah, kam long satia ban rai ban jied nongmihkhmat da ka jingshit khlieh, ban jied MP da ka jingsngew tynnad na ka jingput jingtem hynrei ban jied MP da ka jingkitkhlieh bad ka jingïohi jngai,” la ong u Bah Robertjune. U la ong ruh ba lada u ïoh ka jingjop ha kane ka kynti ba mynta, ka mat kaba nyngkong eh ban ïakren ha Parliament ka long ban wanrah ïa kita ki aiñ ban ïoh ban ïada ïa la ka jong ka ri bad ka jaidbynriew.
U Bah Robertjune u la ong, ka la don ka jingkynthoh bad jingkynnoh na kiwei, kiba la shu kynthoh khlem lah pat ban pynshisha, kum ka jingkynnoh ba kum ki Balang ki la pheil, ki seng ba bun ki la ïalam bakla hynrei kim shym la lah pat ban pynshisha bad tang ban shu pyrta bad hylla ha surok. Ki ong ruh ba ki kwah ïa ka synshar kaba khuid hynrei ki sdang pat da kaei-kaei ka bym khuid satia, u la ong.
U la ong ba ka jingjot ka la ap lypa ïa ka jaidbynriew lada ka Congress kan wan ha ka bor, naba ka la dep ban ong lypa ba lada poi ha ka bor, kan wanrah ïa ka aiñ kaba shah ban ïashongkha para kynthei bad para shynrang.
