Shillong, Ïaïong 16
U President ka Voice of the People Party (VPP), Bah Ardent M. Basaïawmoit u la kyntu ïa uwei na ki nongaibuit u Myntri Rangbah ka Jylla (khlem da shim kyrteng) ban ai jingmut sha u (Myntri Rangbah) ba un ai jingbit noh ïa ka Central Bureau of Investigation (CBI) ba kan ïoh treikam hapoh ka Jylla.
“Mynnin ki kob ïa u Bah Ardent, ki ong ïa ngin ïa leit sha ka CBI…ki long ki nongaibuit jong u Myntri Rangbah. Nga kwah ban kyntu na kane ka jingïalang – haba phi long u nongaibuit jong u Myntri Rangbah, sngewbha ai jingmut noh wut-wut ïa u Myntri Rangbah ba un ai ïa kata ka jingbit ne jingmynjur ïa ka CBI ba kan sdang ban wan treikam noh hangne ha Jylla,” la ong u Bah Basaïawmoit haba ai jingkren ha ka jingïalang kaba la long ha Mawkhar ha ka Sngi Ba-ar.
U la ong ruh ba ka bor jong ka jingai jingbit ne jingmynjur ka shong ha ka Sorkar Jylla naba ka CBI kam lah ban shu mushlia ne tuklar wat lada ka kwah eh ban leh.
“Ka CBI ka kwah ïa ka jingbit ne jingmynjur jong ka Sorkar Jylla…kim ai. Ki mut ban pynbiej ïa ngi…to ngin ïa leit shuwa tang ha Lokayukta,” la ong u nongïalam ka VPP.
Haba pynsngew ba ha kine ki sngi ki la don kiba sdang ban kynthoh ïa ki MLA ka VPP halor ka jingbym ai ïa ka skhim MLA (` 10 lak) kaba ki paidbah ki dei hok ban ïoh, u Bah Basaïawmoit u la ong ba um kwah ban ïa bun ktien halor katei ka bynta hynrei u la wer kita kiba kynthoh ban ïa leit sha u Lokayukta khnang ban ïaid shakhmat bad ka jingtohkit halor kane ka bynta.
“La buh khnang ïa u Lokayukta ban tohkit wat ïa ka jingpyndonkam ïa ka skhim MLA. Ynda ngi la ong kumta, hana uuu…pynsngap sa ïa uto u khynnah shitkhlieh. Ym dei ma ngi kiba leit kynthoh ïa ki…dei ma ki. Nalor kata, ynda ngi la ong kumta, kim treh,” u la ong.
Ha kajuh ka por, u la pynsngew ba ki don ka jingtieng naba ki la sngewthuh ba lada u jop u ‘Prah’ ha kane ka kynti, khlem pep, un synshar beit ha ka Jylla bad un peh ïa ka bamsap, ka jingduk bad ka jingleh shiliang khmat.
“Namarba ngi-ngi kren pyrshah ïa ka bamsap, u Symbud Myntri Rangbah ka Jylla u ong ba lada u Bah Ardent u lah ban pynshisha ba nga bamsap, nga kloi ban hiar shuki noh. Ngi lei ngim pat jer kyrteng, ngi dang shu ong ba ka jur ka bamsap ha Meghalaya…balei ngin pynshisha haba ngim pat jer kyrteng,” u la ong.
Na ka liang u Bah Basaïawmoit haba pynkynmaw ba u Myntri Sorkar Pdeng, u Amit Shah u la kynnoh ïa ka MDA kum kaba bamsap tam, u la ong, “Ïa u Amit Shah kim nud, ki tieng ïoh u phah da ka CBI.”
Shuh shuh u la bynrap, “Ngi shu ong ïa u paidbah, ai lad ïa ka VPP ba kan synshar ïa ka Meghalaya…ngin sei lut ïa ki kam bamsap baroh bad lada ngi lap ba uta u Symbud Myntri Rangbah ka Jylla u bamsap, ngin ym map,” ong u President.
