Shillong, Ïaïong 16
U President ka Voice of the People Party (VPP), Bah Ardent Miller Basaïawmoit, u la ther tyngeh ïa u MLA barim jong ka Mawlai konstitwensi, u Bah Embhahlang Syiemlieh uba la kren sngew myllung ha kaba ïadei bad ka jingshah kren beiñ ki nongïalam balang ha ki rynsan ‘social media’.
Haba ai jingkren ha ka jingïalang ïalap ilekshon jong ka VPP kaba la long ha ka janmiet Sngi Ba-ar ha Mawlai Phudmuri, u Bah Ardent u la ong ba utei u nongmihkhmat barim ka Mawlai u la kren sngew myllung bad u da don por ban pule ïa ki jingthoh ha ki rynsan ‘social media’ hapoh ka ‘YouTube Channel’ ba la thoh da ki paidbah kiba lehse ym dei satia ki nongkyrshan ba shisha jong ka VPP lane kiba da ai shisha ne em ïa ka kyrteng kaba dei hok jong ki ruh.
U Bah Ardent u la ong ba utei u nongmihkhmat barim u la kren bad pule ïa ki jingthoh kumto ba un ïam namar ka jingshah kren beiñ ki nongïalam balang bad ka jingwanrah jong u ïa ka jingsngew kynhun ha kane ka jingïaid lynti ha ka saiñ hima-sima ka long kaei-kaei ka pop ïa ka Jaitbynriew ban phiah ha ka kyrteng jong ka niam.
“Balei uta u MLA barim, uta u Embhah um ïam bad haduh mynta um pat pynshitom ïa kiba siat ïap ïa u Bah Cherishstarfield Thangkhiew? Balei um ïam na ka bynta jong ki?”, la buh jingkylli u Bah Ardent.
U Bah Ardent u la ong ba ki bahaïing bahasem jong u Bah Cherishstarfield Thangkhiew ki don ïa ka hok ban ïoh ïa ka bishar kaba hok hynrei ka jingleh mynleh ïam jong u Bah Embhahlang ka dei namar ba u lah shah ban ïam bad lada um leh kumta, un shah weng na ka kam Chairman ne Deputy Chairman na ki tnad kam sorkar bapher-bapher.
“Ki ïam namar la siew ïa ki ba kin ïam namar lada kim leh mynleh ban ïam, ki lah ban shah weng na ka kam Chairman lane Deputy Chairman. Phi mut wan pynbiej ïa u paidbah tang ban biang ka pla jong phi?”, la ther u Bah Ardent.
U la ong ba kum ki paidbah ki dei ban long kiba stad bad ka VPP ka la leit sha u paidbah ban hikai bad pynshlur ïa u paidbah ïa ka lynti kaba dei. Hynrei kiwei ki seng saiñ pyrthei ki la beiñ bad ki la ïalam bakla ïa u paidbah da kaba ki la pynsngewthuh bakla ïa u paidbah ba lada ki paidbah ki jied ïa ka VPP bad ïa u Bah Ardent, kin leh aïu marwei shapoh Delhi ha ka ïing kaba don 500 tam ki MP.
“Lada jied ïa ka NPP bad ka Congress ka mut yn mih 5 lak, hynrei marwei hi phi hap ban leit sha Delhi ym 5 lak ngut”, la ong u Bah Ardent.
