Shillong, Ïaïong 16
Ki thylliej ding kiba klang shi kat dei ki la ïoh ban bam duh naphang ïa ki ar tylli ki ïing ha ka shnong Mawïong Umjapung. Hynrei kaba sngewphylla ka long ba wat la baroh ki jingdon-jingem ki la ingkhong lut tangba ka ‘Bible’ kam shym la ing satia.
Kane ka jingjia, ka la jia ha ka step jong ka Sngi Ba-ar ka 16 tarik ha ka por kumba 8.30 eiei ha ka dong Nongneng Block A. Ka ding ka la bam duh naphang ïa baroh ki jingdon-jingem jong kine ar tylli ki ïing hynrei wat la ki thylliej ding ki la klang bha, kim shym la ktah satia ïa ka ‘Bible’ wat tang khyndiat ruh.
Kine ki ïing kiba la shah bam duh ha ka ding, kawei ka dei jong ka Kong Risuk Wanshong bad kawei pat jong ka Kong Twintina Nongneng. Mar ïa ïoh jingtip halor kane, ki pulit bad ki kali pynlip ding ki la hiar sha kane ka jaka ban tem ïa ka ding.
Wat la ka jingtohkit ka dang ïaid, hynrei la suba ba kane ka jingpluh ding ka lah ban dei namar ka jingkem ding jong u ‘Meter Box’.
Kaba phylla ha kane ka jingpluh ding ka long ba wat hadien lajan baroh ki jingdon-jingem ha kawei ka ïing ki la ing bad julor lut, hynrei ka Kotbah lane ka Bible kam shym la ing wat tang kawei ka sla ruh. Ïa kane la pyntip da u Rangbah Shnong, u Bah Herman Dohtdong.
U Rangbah Shnong u la ïathuh ba ka shnong ka la pyrshang kat lah kat ïai ban ïarap hadien ba la ïoh ïa ka jingpyntip na ka trai, bad pynpaw ruh ka jingsngewnguh ba ha kane ka jingjia pluh ding kam shym don ka jingmynsaw ne ka jingduh ïa ki mynsiem briew. Ha kajuh ka por u la ai khublei ruh ïa ki pulit pynlip ding kiba la poi mar-mar sha katei ka jaka ban tem ïa ka ding.
