New Delhi, ïaïong:
Ka Election Commission ha ka Lah Sngi U Blei, ka la ong ba ki jingpyntreikam na ka bynta ka General Elections 2024 ka dang ïai bteng, ha kaba ïadei bad kane, la ïoh ban kurup ïa kaba bun ka pisa kaba la paw ba ka la bun tam na ka jingïoh kurup kumba la long ha ki por ba la leit ha ki 75 snem jong ka jingdon ka ilekshon Lok Sabha ha ka ri.
Ka jingthoh ba la phah da ka kynhun ba dei khmih ha ki kam ilekshon ka la ong ba ki kynhun wad-bniah ki la ïoh ïa ka jingjop kaba pynsah kynmaw ha kaba ki la ïoh ban kurup ïa palat T. 4,650 klur ka pisa bad kiwei pat ha ka jingpyntreikam jong ka ECI ban pynlong ïa ka jingkhynra khnang ban kurup ïa ka pisa ba la pyntreikam beaiñ wat hashwa ban pynlong ïa ka ilekshon jong ka bynta kaba nyng-kong jong ka ilekshon Lok Sabha kaba 18 ka ban long ha ka sngi Thohdieng.
Ka pisa ba la ïoh ban kurup ka la kiew na ka T. 3,475 klur ha ka por ba don ka ilekshon Lok Sabha ha u snem 2019, ka la ong. Kumba la pynshisha la ong ba la don kumba 45 percent ka jingïoh ban kurup ïa u drok bad ki jingdih pynbuaid kiba la kot sha ka T. 2,068.10 klur, kine ki dang don mynta hapdeng ka jingkhmih bniah jong ka Commission, ka kynhun ba dei khmih halor ki kam ba ïadei bad ka ilekshon ka la bynrap shuh shuh da kaba ong ba ki jingïoh ban kurup ki dei kiba la mut lypa ban pyntreikam beaiñ, ha kaba kane ka la kiew bha.
Nalor ki drok, ki kynhun EC ki la ïoh ban kurup da kumba T. 395.39 klur ka pisa, T. 489.31 klur ka kyiad, ki jingdon jingem kiba remdor kiba la kot sha ka T. 562.10 klur bad ki jingai sngewbha ba la thmu ban pynbiej sha ki nongthep vote bad kiwei pat ki tiar ki la kot sha ka ` 1,142.49 klur.
Ha kaba ïadei bad ka jingjia kaba la jia ha Nilgiris, ha Tamil Nadu, ka Commission ka la pynsangeh kam shipor ïa u nongïalam jong ka kynhun Flying Squad namar ka jingbym kitkhia ban leh ïa ka kamram bad ban khmih bniah ïa ka kynhun jong u nongïalam ba pawkhmat, u la ong.
“Kumjuh, ki heh pulit ki la khmih bniah ïa ki kali jong ka kynhun jong u Myntri Rangbah jong ka jylla bad kumjuh ïa ka kali jong u Symbud Myntri Rangbah ha kawei pat ka jylla. Ka Commission ka la pyntreikam pyrkhing ruh pyrshah ïa kumba 106 ngut ki nongtrei sorkar, ha kaba la lap ïa ki ba ki la ai ka jingïarap bad ka jingkyrshan ïa ki riewsaiñ pyrthei kiba don bynta ha ki jingïalap ilekshon, ha kaba kane ka la pynkheiñ ïa ka jingtreikam jong ka Code of Conduct bad kiwei pat ki kyndon,” la ong u Chandak.
